Tơ̆ Hop akŏm, rim kơdră tang măt hlôi pơma dơnuh, tơlĕch rim trong jang atŏk tơ iung mŭk drăm-tơpôl 6 khei hơtuch sơnăm 2023. Lơ̆m au, akŏm rim trong jang vă atŏk kơtang ming man păng tơlĕch kon jên jang ăn dôm tơdrong jang kăl, tơlĕch jang hơdrol rim tơdrong vă jang găh 3 tơdrong jang tơm Teh đak, tơdrong jang hơmet ming păng atŏk tơ iung muk drăm, bơ̆ jang iŏk tơvih teh pơm trong gre rĕnh Buôn Ma Thuột -Khánh Hoà.

Atŏk kơtang tơdrong jang đĭ đăng kon pơlei vang vei lăng teh đak, vei lăng sơđơ̆ng chĭnh trĭ tơpôl. Iung pơma tơ̆ hop akŏm, Bí thư Đảng dêh char Đak Lăk-Ƀok Nguyễn Đình Trung athei: lơ̆m khei năr kơnh, khul kơdră chĕp pơgơ̆r đảng, chĕp pơgơ̆r tơring, rim hơnih jang hơnơ̆ng jang kiơ̆ kơjăp rim tơdrong jang chinh trĭ kơ dêh char, hơnơ̆ng tơplih ‘nao, atŏk jang ‘lơ̆ng, jơnei lơ̆m bơ̆ jang pơrô̆, dăr lăng, pơtrŭt tơlĕch jang kiơ̆ rim tơdrong tơchơ̆t, nơ̆r athei jang kiơ̆ đơ̆ng Trung ương, đơ̆ng dêh char.