Tơ̆ Hop akŏm Kơpal ASEAN+3 'măng mă 26, dôm pah sơkơ̆t dơ̆ng tơdrong kăp gĭt kơ jang hadoi ASEAN+3 hăm tơdrong rơngei, sơđơ̆ng, jang hadoi păng hơtŏk tơ-iung. Kơdră ASEAN+3 drơ̆ng nơ̆r jang hadoi tơlĕch jang đei jơnei Tơdrong jang hadoi ASEAN+3 jăl sơnăm 2023-2027, lơ̆m noh đei chĕp vei jơhngơ̆m pran gah jang hadoi mŭk drăm, tĕch pơdro, jên hu, jang gah pơgang hơmet jĭ jăn... păng pơih să dôm tơdrong jang hadoi 'nao, akŏm tơplih 'nao gơh hơgei, vei sơđơ̆ng tơmam drăm sa, tơplih jang gah unh hơyuh, hơyuh tŏ 'mi tơplih... hơyak hơtŏk tôm tơdrong păng kơjăp sơđơ̆ng. Thủ tướng teh đak bơ̆n Phạm Minh Chính hơpơi 'meh ASEAN+3 gô đei sơnong jang kăp gĭt lơ̆m tơdrong tơlĕch trong pơm jang, atŭm băl găn hloh tơnap tap hrat hrĭn hrei âu.

Tơ̆ Hop akŏm Kơpal ASEAN - Hoa Kỳ 'măng mă 11, Phŏ Kơdră Kamala Harris sơkơ̆t hơdah Hoa Kỳ pơkăp pran kơtang păng đunh đai hăm ASEAN păng tơring, tơgŭm ASEAN jing sơnong jang tơm, ră hơdah 2 pah asong pơyua păng sơkơ̆t đunh đai, atŭm tơjră hăm dôm tơnap tap atŭm. Tơ̆ Hop akŏm Kơpal ASEAN-Canada, rim pah duh hlôi drơ̆ng nơ̆r hơlen Tơchơ̆t atŭm hơtŏk jang tơbôl Tôm tơdrong ASEAN-Canada. 'Năr âu, năr 7/9/2023, Kơdră kơ dôm teh đak gô năm Hop akŏm Kơpal ASEAN hăm Ấn Độ păng Hop akŏm Kơpal Đông Á (EAS).

Atŭm hăm hop akŏm, lơ̆m năr 6/9, Thủ tướng teh đak bơ̆n Phạm Minh Chính hlôi tơƀơ̆p Thủ tướng Canada Justin Trudeau, Thủ tướng Nhâ̆t Kishida Fumio, pơma đam hăm Kơdră teh đak Hàn Quốc Yoon Suk Yeol păng Thủ tướng Trung Quốc Lý Cường.