Hop akŏm Lĭ luơ̆n ‘măng mă 18 đei pơgơ̆r ƀât mă tơdrong pơvei đơ̆ng 2 Đảng, 2 teh đak oei tŏk ‘lơ̆ng hơnơ̆ng, iŏk đei lơ tơdrong jơnei găh rim tơdrong; 2 teh đak ‘nao tơbăt 15 sơnăm pơjing tơdrong pơvei jang hơdoi gĭt kăl tôm tơdrong. Tơ̆ hop akom, 2 ‘nu Kơdră chĕp kơ̆l Khul pơma hơdăh tơdrong gĭt kăl đơ̆ng hơtŏk tơdrong pơma nuh lĭ luơ̆n đơ̆ng 2 Đảng lơ̆m chăl ‘nao, akhan ‘nâu jĭ jơnăr vă 2 păh vang pơma nuh, roi tơbăt dôm tơdrong jơnei đơ̆ng pơma tơblang păng dôm tơdrong gĭt kăl iŏk đei tơ̆ yăn âu đơ̆ng 2 Đảng lơ̆m tơdrong chĕp kơ̆l pơgơ̆r păng bơ̆ jang dôm trong jang, tơdrong tơgŭm găh vei lăng cham char, bri brăh, mă loi lơ̆m khei ‘năr atŏk tơiung jang hăm kơmăy kơmŏk ‘nao păng jang tŏk teh đak.

Hop akŏm oei tơgop pơm pơ ‘lơ̆ng hlŏh dơ̆ng tơdrong pơvei jang hơdoi gĭt kăl tôm tơdrong Việt Nam - Trung Quốc. Lơ̆m jơ pơma nuh, dôm bơngai tang măt 2 păh hlôi pơma tơƀôh rim tơdrong tơ̆ yăn âu tơ̆ 2 păh, pơma tôch hơlen, roi tơƀôh dôm tơdrong jang đei jơnei ‘lơ̆ng, kŭm nhen dôm tơdrong tam mă pran lơ̆m tơdrong vei lăng cham char bri brăh.