Pơma pơma tơƀôh, pơtôch Hop akŏm, ƀok Lương Cường, Bơngai jang lơ̆m Anih tơm Chĭnh trĭ, Chĕp kơ̆l Ban Bí thư pơma hơdăh athei tơlĕch jang kiơ̆ Tơdrong hơgăt kơsô̆ 144 păng Tơchơ̆t kơsô̆ 35 tơpăt, đei yua, pơm tơplih rơđăh găh đon hlôh vao păng bơ̆jang lơ̆m đĭ đăng Đảng, khŭl jang chĭnh trĭ, hơtŏk tơdrong drơ̆ng lăp lơ̆m tơpôl păng kon pơlei.

Lơ̆m noh, hăm Tơdrong hgăt kơsô̆ 144, rim kơđră đảng, anih jang đảng, kang ƀô̆, đảng viên kăl kơ ling lang hơtŏk ‘lơ̆ng đon hlôh vao găh tơdrong gĭt kăl đơ̆ng tơdrong hơgăt, băt hơdăh, hlôh jrŭ Tơdrong hơgăt; lăng kăl hơnăp jang đơ̆ng chi bộ, chi ủy, mă lei ‘noh jĭ bơngai chĕp kơ̆l đảng lơ̆m kơplăh vei kơjăp, pơgơ̆r jang kiơ̆ tơdrong Hơgăt; rim kang ƀô̆, đảng viên athei băt kơdih hŏk pơhrăm, hơdrin mă ƀrĕ, lăng kơdih, hơmet ming kơdih kiơ̆ pơkăp jơhngơ̆m đon ‘lơ̆ng kach mang.