Hop akŏm ‘măn lơ jơ pơma nuh, drơ̆ng nơ̆r hăm dôm tơdrong iŏk đei mưh tơlĕch jang lơ̆m sơnăm âu ki, mă loi jĭ dôm tơdrong mă 2 păh hlôi sek tơlang kĕh, dôm tơdrong oei đei, trong vă sek tơlang kŭm nhen dôm tơdrong jang, trong vă jang ‘nao lơ̆m sơnăm 2024.

Pơma pơtôch hop akŏm, 2 Thủ tướng pơma hơdăh vă akŏm jơhngâm chĕp kơ̆l pơgơ̆r, pơtho ăn dôm anih tơm, anih jang kơpal, tơring tơrang, anih tĕch mơdro, khul grŭp đei ƀơm truh vang jang hơdoi mă kơjăp, tơlĕch jang đei yoa ‘lơ̆ng dôm tơdrong drơ̆ng nơ̆r, hơnơ̆ng pơjing tơdrong ‘lơ̆ng hlŏh ăn anih tĕch mơdro kơ 2 teh đak jang hơdoi, tơmât jên jang xa, pơm tơlĕch, tĕch mơdro. 2 păh lui, tơdrong jơnei đơ̆ng Hop akŏm gô pơjing đei jơhngâm pran ‘nao tơgŭm ăn tơdrong pơvei jang hơdoi đơ̆ng 2 teh đak roi đunh roi tŏk pran ‘lơ̆ng, roi đei yoa, lui băl, hơnơ̆ng hơmet kơjăp tơdrong pơvei ‘lơ̆ng hơiă đơ̆ng sơ̆, mât 1 ƀơ̆r đon kơjăp ‘lơ̆ng, kăp gĭt păng jang hơdoi tôm tơdrong Việt Nam-Lào tơ̆ hơnăp kơnh.