Hop akŏm đei pơih trư̆k tuyê̆n truh tơ̆ Anih vei lăng kon pơlei 28 dêh char, plt tơter đak dơsĭ păng dôm anih tơm, anih jang kơpal đei ƀơm truh. Pơma tơ̆ hop akŏm, Phó Thủ tướng Trần Lưu Quang pơma hơdăh, tơdrong răm đơ̆ng ưh đei plĕh lê̆ “The jơk” EC păng tơdăh đei dơ̆ng “The ƀrê” ‘nŏh ưh lăp hiong răm găh mŭk drăm đĕch mă oei ƀơm kơnê̆ truh bưng ai, đon lui hăm teh đak Việt Nam dơ̆ng, anih jang ka hơdang athei tơjră dơ̆ng hăm tơdrong krê đei "the jơk" tơ̆ dôm anih tĕch mơdro ‘ngoăih kơ EU hai. 

Phó Thủ tướng athei dôm khul jang kơpal bơ̆ jang tơ̆ đak dơsĭ hơtŏk tơdrong dăr joang, vei lăng kơjăp, ưh ăn ƀato jang ka yơ pơm glăi tơ̆ tơring đak dơsĭ teh đak đe. Anih tơm vei lăng Công an jăh pơgơ̆r dăr hơlen, chih hơdăh dôm tơdrong glăi đei ƀơm truh, chih hơdăh dôm kơloăi ka hơdang; pơm hơmet hla ar, tơkêng dôm bơngai pơm kơdranh chă trong ăn ƀato, bơngai jang ka Việt Nam năm rôp yâu glăi luơ̆t tơ̆ tơring đak dơsĭ teh đak đe.