Hơdrol kơ Hop akŏm, Anih tơm Chĭnh trĭ roi tơbăt ăn Anih chĕp kơ̆l pơgơ̆r Trung ương Đảng găh tơdrong Anih tơm Chĭnh trĭ hlôi tơchơ̆t klăih song ăn ƀok Đại tướng Lương Cường, Bơngai jang lơ̆m Anih tơm Chĭnh trĭ, Kơdră vei lăng Anih jang Chĭnh trĭ Khŭl lĭnh kon pơlei Việt Nam vang jang lơ̆m Ban Bí thư păng pơm Kơdră chĕp kơ̆l pơgơ̆r Ban Bí thư; ƀok Lê Minh Hưng, Bí thư Trung ương Đảng, Chánh Văn phòng Trung ương Đảng pơm Kơdră Anih pơgơ̆r Trung ương, Chánh Văn phòng Trung ương Đảng. Đang kơ ‘noh, Trung ương ăn tơgop nơ̆r găh tơdrong jang rơih bơngai jang păng set hơlen, ki luơ̆t kang ƀô̆. Tơ̆ kơsơ̆, Anih chĕp kơ̆l pơgơ̆r Trung ương Đảng bơ̆jang tơ̆ grŭp, pơma dơnuh găh Tơdrong jang hơdăh Tơroi tơbăt chĭnh trĭ đơ̆ng Anih chĕp kơ̆l pơgơ̆r Trung ương Đảng jăl XIII tơ̆ Hop akŏm bơngai tang măt lơ̆m teh đak ‘măng mă XIV kơ Đảng, Tơdrong jang hơdăh Tơroi tơbăt 5 sơnăm bơ̆jang kiơ̆ Tơdrong jang gĭt kăl hơtŏk tơiung mŭk drăm - tơpôl 10 sơnăm (2021 - 2030), Trong tơlĕch jang hơtŏk tơiung mŭk drăm - tơpôl 5 sơnăm, jăl jang 2026 - 2030.

Kŭm ƀât blŭng Hop akŏm ‘măng mă 9 Khul kơdră chĕp kơ̆l Trung ương Đảng jăl XIII pơgê ‘năr 16/5 mơ̆n, Khul kơdră chĕp kơ̆l Trung ương pôk tơmât dơ̆ng 4 ‘nu bơngai mât jang lơ̆m Anih tơm Chinh trĭ jăl XIII. Kiơ̆ kơ ‘nŏh, Trung ương pôk tơmât 4 ‘nu kơdră jang lơ̆m Anih tơm Chinh trĭ jăl XIII đei: Ƀok Lê Minh Hưng, Bí thư Trung ương Đảng, Kơdră Anih pơgơ̆r Trung ương, Kơdră Anih pơvih ăn Trung ương Đảng; Ƀok Nguyễn Trọng Nghĩa, Bí thư Trung ương Đảng, Kơdră chĕp kơ̆l Ban Tuyên giáo Trung ương; Yă Bùi Thị Minh Hoài, Bí thư Trung ương Đảng, Kơdră Anih krao hơvơn kon pơlei Trung ương; Ƀok Đỗ Văn Chiến, Bí thư Trung ương Đảng, Bí thư Đảng khul, Kơdră Anih Trung ương Mặt trận Tổ quốc Việt Nam.