Tơ̆ hop akŏm, Thủ tướng ră hơdah, Tơdrong jang “Hơtŏk tơ-iung kơjăp 1 trĭu hectar ƀa ‘lơ̆ng, ưh đei pơm kơnê̆ truh cham char tơguăt hăm hơtŏk tơ-iung jơk tơ̆ tơring tơmăn đak krong Cửu Long truh sơnăm 2030” đei Thủ tướng teh đak kĭ pơkăp ah khei 11/2023 truh dang ei hlôi tơlĕch jang đei jê̆ 1 sơnăm. 

‘Nâu jing Tơdrong jang kăp gĭt hăm bơngai jang mir tơ̆ tơring tơmăn đak krong Cửu Long, hăm tơdrong jang gah phe ƀa păng hăm sơnong jang tơjră hăm tŏ ‘mi tơplih, jang kiơ̆ tơchơ̆t sơđơ̆ng hăm tŏ ‘mi kial, tơjur ƀiơ̆ tơdrong tơpăr hơyuh pơm tŏ hnam pơnĭl, pơkăp tơdrong tơpăr hơyuh ‘mê̆ tơjur ah kơsô̆ "0" kiơ̆ trŏ nhen tơchơ̆t đơ̆ng Việt Nam ah Hop akŏm COP26. Tơ̆ Hop akŏm âu, Thủ tướng pơtruh nơ̆r hăm rim bơngai tang măt akŏm kơ̆l ‘ngok hơgei, jơhngơ̆m pran; tơdrong pơtruh nơ̆r athei mă bot, hơdah, tơroi tơpăt tơdrong kăl; tơlĕch dôm sơnong jang, trong jang vă pơm jang lơ̆m khei năr truh, vă đei jơnei tơchơ̆t tơlĕch jang; vei sơđơ̆ng ‘lơ̆ng trŏ kơ tơdrong Hop akŏm.