Kang ƀô̆, bơngai jang lơ̆m lĭnh so plang song hloh 34.200m2 teh, tơgop dôm jĭt rơbâu năr jang hơmet ming, pơm ‘nao 200km trong lơ̆m pơlei, hơbong thong đak tơ̆ chŭn na; sut đei 500 hnam pơgia, pơm ‘nao 44 hnam ‘Mêm mơnat Lĭnh so; hloh 800 tơdrong jang pơgar să, hơp tak xăh, anih mơdro sa đơ̆ng dôm lĭnh so păr ang pran kơtang jơhngơ̆m đon yak hloh mơmat tat hơtŏk tơiung mŭk drăm.

Pơma tơ̆ hop akŏm, Thượng tướng Bế Xuân Trường, Kơdră Khŭl lĭnh so Việt Nam lăng ‘lơ̆ng tơdrong jang pơgơ̆r hop akŏm đơ̆ng khŭl lĭnh so dêh char Kon Tum; chih iŏk, pôk pơ ư jơhngơ̆m đon hơdrin đơ̆ng bơngai lĭnh so lơ̆m vang jang pơjing, vei lăng Đảng, khŭl kơdră păng kon pơlei; tơgoăt 1 jơhngơ̆m đon tơgŭm băl hơtŏk tơiung mŭk drăm.