‘Măng pơlong tốt nghiệp jăl 3 sơnăm ‘nâu đei hloh 1 triệu hŏk tro chih măt vang pơlong. Hloh 2 năr pơlong kơ sô̆ hŏk tro năm pơlong iŏk đei kơ sô̆ 98,86%. Lơ̆m teh đak đei 2.272 hơnih pơlong păng 43.032 lăm pơlong. Hơlen lăng tam mă tôm, tơdrong jang hơmet ăn pơgơ̆r pơlong đei bơ̆jang kơchăng, ‘lơ̆ng tôm tơdrong. Tơdrong pơgơ̆r lăng pơlong tơ̆ đĭ đăng dôm hơnih pơlong vei sơđơ̆ng tơpăt; Đề pơlong oei lơ̆m ƀai hŏk jăl 3, lăng kiơ̆ tơdrong hlôh vao lăp hăm gơh pơm ƀai vă pơm tơdrong tơm lăng kiơ̆ set ăn tốt nghiệp jăl 3 păng pơtruh hla ar chih răk lui ngeh vă dôm anih vei lăng pơtho pơhrăm, pơtho tơdrong jang hơlen lăng iŏk yua lơ̆m rơih hŏk tro mơ̆t hŏk.

Tơdrong jang tang găn pơgơ̆m kơmăy kơmŏk hơgei hlôi đei vei kơjăp, mă lei, lơ̆m kơplăh lăng pơlong, oei đei 1,2 ‘nu hŏk tro pơ rơ̆ng pơm glăi tơdrong yua điên thoăi lơ̆m lăm pơ long păng 1,2 ‘nu thây kô tam mă pơm kiơ̆ ƀlep, tôm trong jang hơgăt ƀơ̆t lăng pơlong. Mă hơdăh, đei 41 ‘nu hŏk tro đei ưh kơ ăn pơlong. Tơ̆ jơ hop akŏm tơ roi tơbăt, tang măt Anih tơm vei lăng găh pơtho pơhrăm kŭm tơ̆l nơ̆r lơ nơ̆r apĭnh tơ tŏ tơdrong lĕch đề pơlong, băt đề pơlong tơ̆ Cao Bằng, Yên Bái…