Hop akŏm yoa Anih vei lăng kon pơlei dêh char Khánh Hòa jang hơdoi hăm Anih tơm jang tơbôl, Anih tang măt ăn Indonesia pơgơ̆r, hăm tơdrong vang akŏm đơ̆ng hlŏh 350 ‘nu bơngai tang măt. Hrei ‘nâu, lơ̆m ASEAN, Indonesia jĭ teh đak tĕch mơdro hơdoi tih mă 3 kơ Việt Nam, oei Việt Nam ‘nŏh jĭ teh đak tĕch mơdro hơdoi teh mă 4 kơ Indonesia.

Khei ‘năr âu ki, jên tĕch mơdro 2 pang đơ̆ng 2 teh đak tŏk ‘lơ̆ng, đơ̆ng 9 ti đô la Mi sơnăm 2019 tŏk truh 14 ti đô la lơ̆m sơnăm 2023. 2 teh đak oei jang hơdoi lơ tơdrong nhen choh jang xa – ka hơdang, chă tơmang lăng, pơvei kon pơlei, pơtho pơhrăm... Tơ̆ hop akŏm, kơdră chĕp kơ̆l dêh char Khánh Hòa păng dôm bơngai tang măt truh đơ̆ng Indonesia vang pơma nuh găh hơtŏk tơdrong jang hơdoi nhen choh jang xa hăm kơmăy kơmŏk ‘nao, jang ka hơdang kơjăp ‘lơ̆ng, jang mŭk drăm kơsô̆ păng jang hơdoi găh chă tơmang lăng, hơtŏk tơdrong tĕch mơdro hăm teh đak đe.