Pơma ah hop akŏm, ƀok Phạm Tấn Công, Kơdră Jơnŭm jang Tĕch pơdro păng Kŏng ngĭp Việt Nam (VCCI) ră hơdah: Hăm tơdrong sơkơ̆t anih jang mŭk drăm jing khul dơnơm lơ̆m tơdrong jang mŭk drăm, noh bơngai jang mŭk drăm jing khul jang dơnơm lơ̆m pơgơ̆r, vei lăng khul jang mŭk drăm kơ teh đak.

Ƀơ̆t Năr bơngai jang mŭk drăm Việt Nam (13/10), sơnăm âu khul jang mŭk drăm sơng Tơchơ̆t 41 đơ̆ng Anih tơm Chĭnh trĭ Gah pơjing păng chĕp vei sơnong jang kơ khul jang mŭk drăm Việt Nam lơ̆m khei năr ‘nao, đei lơ tơdrong ‘nao gah đon kơchĕng, sơkơ̆t trong jang păng trong hơtŏk bơngai jang mŭk drăm Việt Nam lơ̆m jăl jang truh âu kơnh, hơyak jang kiơ̆ tơdrong hơpơi ‘nhăk teh đak bơ̆n jing teh đak hơtŏk tơ-iung ah sơnăm 2045.