‘Măng pơlong tốt nghiệp hŏk jăl 3 sơnăm 2024 đei pơgơ̆r vei sơđơ̆ng nhen sơnăm 2020-2023. Akŏp kơsô̆ hŏk tro chih măt vang pơlong sơnăm ‘nâu ‘noh hloh 1 triệu 71 rơbâu ‘nu oh, tŏk hloh 45 rơbâu ‘nu hŏk tro pơting hăm sơnăm sơ̆. Pơma pơtôch tơ̆ ‘măng hop akŏm, Phŏ Kơdră Anih tơm vei lăng găh pơtho pơhrăm Phạm Ngọc Thưởng, Kơdră Anih pơgơ̆r jang kơ teh đak ‘Măng pơlong tốt nghiệp hŏk jăl 3 sơnăm 2024 athei Anih pơgơ̆r pơlong rim dêh char, pơlei tơm hơnơ̆ng vei kơjăp, tơlĕch jang kiơ̆ ‘lơ̆ng Tơdrong tơchơ̆t 15 đơ̆ng Thủ tướng Teh đak găh hơtŏk loi dơ̆ng pơgơ̆r, jang hơdai pơgơ̆r ‘Măng pơlong tốt nghiệp hŏk jăl 3 păng rơih hŏk tro mơ̆t hŏk đăi hŏk, pơtho pơhrăm tơdrong jang sơnăm 2024.

Tơdrong jang atŭm ‘noh jĭ ‘nĕ kơ pơm pơhơi păng pơm tơdrong hiôk ‘lơ̆ng hloh ăn kơ hŏk tro, mĕ ƀă hŏk tro, ‘nĕ kơ lê̆ hŏk tro hơ yơ hŭt pơlong yua kơ tơdrong mơmat tat; vei sơđơ̆ng ‘lơ̆ng tôch ai, ƀlep; hơmet pơ ‘lơ̆ng dôm tơdrong đei ƀôh, tơdrong ưh kơ ê; ưh kơ gơh lê̆ hŏk tro chĕp ba điên thoăi, tơmam roi tơbăt pơma dơnuh mơ̆t lơ̆m lăm pơlong.