Thượng tướng Lương Tam Quang, Kơdră jang lơ̆m Trung ương Đảng, Phŏ Kơdră tơm vei lăng Công an, Kơdră Khul pơgơ̆r vei lăng tơdrong sơđơ̆ng pơgơ̆r hop akŏm âu. Nơ̆r athei vei lăng sơđơ̆ng ăn Lêh tơbăt 70 sơnăm tơblăh jơnei Điện Biên Phủ păng dôm tơdrong kăl tih đei Anih tơm vei lăng Công an năng tôch kăl. Kiơ̆ hơnăp jang, tơdrong jang đei pơjao, Công an dôm anih jang, tơring tơrang adrin pơgơ̆r bơ̆ jang, vei lăng mă ‘lơ̆ng tơdrong sơđơ̆ng kiơ̆ nơ̆r athei.

Phŏ Kơdră tơm Lương Tam Quang pơma hơdăh, tơ̆ hơnăp kơnh, đei 3 tơdrong tih kơ teh đak đei pơgơ̆r tơ̆ Điện Biên păng Đà Nẵng. Công an dôm tơring athei drơ̆ng nơ̆r hlôh vao hơdăh tơdrong jang tơm ‘nŏh jĭ vei lăng ‘lơ̆ng tơdrong sơđơ̆ng ăn dôm tơdrong tih âu; ưh gơ̆h lê̆ đei tơdrong ưh hơiă, ưh kơ ê. Pơma hơdăh, năng ‘nâu jĭ tơdrong jang chinh trĭ gĭt kăl kơ đĭ đăng khul linh Công an kon pơlei lơ̆m 6 khei blŭng sơnăm. Phŏ Kơdră tơm Lương Tam Quang athei Công an dôm tơring ưh gơ̆h hŭt đon kơchăng, lăng pơhơi; athei răng hăm rim tơdrong, sek tơlang ‘lơ̆ng đĭ đăng rim tơdrong ƀơm truh tơdrong sơđơ̆ng đơ̆ng tơring hloi.