Hop akŏm vă roi tơƀôh, pơm hơdăh hlŏh dơ̆ng hơnăp jang păng dôm tơdrong tơgop tih tên đơ̆ng khul linh tơblăh păng kon pơlei lơ̆m teh đak, kon pơlei dôm hơdrĕch hơdrung tơ̆ Tây Bắc, mă loi jĭ khul linh păng kon pơlei dêh char Điện Biên.

‘Nâu kŭm jing jơnăr vă dôm bơngai jang khoa hŏk, bơngai tơchĕng hơlen, tơblang hơdăh pơm hơdăh bưng ai, tơdrong gĭt kăl lơ̆m jơhnơr arih, yoa kiơ gơ̆h tơblăh jơnei; tưk tơiung dôm ƀai hŏk kăp gĭt lơ̆m tơdrong pơjing păng vei lăng teh đak hrei ‘nâu. Anih pơgơ̆r hlôi chih tơlĕch lơ tơdrong kăl ‘moi kiơ̆ 104 ƀai chih tơblang, Hop akŏm đei dang 500 ‘nu bơngai tang măt, đei tơdrong vang akŏm đơ̆ng đe kơdră chĕp kơ̆l Đảng, teh đak, Quốc hội. Mă loi, vang truh akŏm đei 3 ‘nu bơngai vang iung tơblăh tơ̆ Điện Biên Phủ sơ̆ hai.