Pơgê năr 9/8, tơ̆ pơlei tơm Nha Trang, dêh char Khánh Hoà, Radiô Nơ̆r Pơma Việt Nam, Ban Tuyên giáo Trung ương, Tổng cục Chinh trĭ Khul Ƀô̆ đô̆i kon pơlei Việt Nam - Hơnih tơm Bô̆ đô̆i vei lăng sơlam teh đak păng Hơnih vei lăng kon pơlei dêh char Khánh Hòa pơgơ̆r Hop tơbăt tơroi tơbăt Tơdrong pơgơ̆r Joh ayŏ kơdŏ soang kăl “Pơdrŏng pran kơtang đơ̆ng đak dơsĭ pơlei pơla”. ‘Nau tơdrong pơgơ̆r joh ayŏ kơdŏ soang gĭt kăl hlŏh vă atŏk kơtang jơhngơ̆m đon hưch hanh hơmanh bơnê, kơrŭn đĭ jơhngơ̆m vei lăng năng tông tơdrong pơm tơ-‘ngla đak dơsĭ, achon đak dơsĭ, păng vă lăng dơ̆ng tơdrong jang kiơ̆ Pơm lêh hop akŏm mă XIII kơ Đảng tơ̆ rim tơring đak dơsĭ, achon dơsĭ đơ̆ng blŭng truh dang ei.

Tơdrong pơgơ̆r đei pơgơ̆r đơ̆ng 8 jơ gơmăng năr 12/8 kơnh hăm 3 tơdrong pơgơ̆r tơm đei hơnăn: "Tơdrong kăl đak dơsĭ”, “Việt Nam lăng truh pơdrŏng đơ̆ng Đak dơsĭ”, "Việt Nam lăng truh pran kơtang găh đak dơsĭ". Tơ̆ jơ hop akŏm tơbăt, ƀok Phạm Mạnh Hùng, Kơ iĕng Kơdră chĕp pơgơ̆r Radiô Nơ̆r Pơma Việt Nam, Kơ iĕng kơdră Khul chĕp pơgơ̆r, Kơdră Hơnih pơrô̆ jang Tơdrong pơgơ̆r joh ayŏ gĭt kăl “Pơdrŏng pran kơtang đơ̆ng đak dơsĭ pơlei pơla”, sơkơ̆t hơdăh Việt Nam ‘noh teh đak đak dơsĭ hăm tơdrong hơpơi ‘meh vă prăt jơhnơr gei kơjăp hăm đak dơsĭ, pơm pơdrŏng đơ̆ng đak dơsĭ păng vei kơjăp rơngei hiôk hian tơ̆ đak dơsĭ, vă atŏk kơtang jơhngơ̆m đon hưch hanh hơmanh bơnê, kơrŭn đĭ jơhngơ̆m vei lăng năng tông tơdrong pơm tơ-‘ngla đak dơsĭ, achon Teh đak, atŏk jơhngơ̆m đon hlôh vao vei lăng năng tông kơjăp mŭk drăm đak dơsĭ, achon dơsĭ Việt Nam.