Hnam hơtaih đơ̆ng pơnơ̆ đak Đăk N’ting pơhlom 500m gah bah đak krong, ‘nhŏng K’Thu, bơngai M’Nông, oei tơ̆ thôn Quảng Tiến, xah Quảng Sơn, hlôi kơdih ‘nhăk hơkăn păng 2 ‘nu kon năm oei gah hnam tơnei tơjê̆ anih jang xah hli kơ dơnâu đak pơchah hơlih ưh kơ ê.

Minh hơdrô̆ ‘nhŏng K’Thu oei tơ̆ hnam, jang pơgar păng hơnơ̆ng kơ hiơ̆r jơhngơ̆m: “Kon pơlei hơrih xa gah hơla dơnâu pơnơ̆ đak âu hiơ̆r kơ đon dêh, ‘mi hơnơ̆ng thoi âu noh kơnh dơnâu đak pơchah hơlih layơ ưh kơ băt. Pơtruh nơ̆r hăm jơnŭm pơgơ̆r tơring mưh ưh đei ming hơmet tơdrong hơlih noh phă hloi dơnâu đak âu vă kon pơlei hoai kơ pơngơ̆t. Oei lê̆ dơnâu đak thoi âu mă pơchah hơlih kơnh đak jroh pơđĭ hloi” .

Ƀok Vũ Tiến Lư, Ƀĭ thư Huyên uy Đăk Glong, dêh char Đăk Nông ăn tơbăt, khei 8/2023, đơ̆ng rŏng kơ đei rơđăng pơchah hơnê̆ dơnâu Đăk N’ting, xah Quảng Sơn, apŭng hlôi ‘nhăk 34 unh hnam kon pơlei hơrih tơ̆ hơla dơnâu đak. Đơ̆ng rŏng kơ noh, kon pơlei chôt vih tơ̆ hnam vă hơrih jang xa. Dang ei, ah khei tơm kơ pơyan ‘mi, tơdrong hli dơnâu pơchah hơlih noh tơnap kơ tơroi hơdrol, athei hơmet tơtenh vă vei sơđơ̆ng tơdrong hơrih păng mŭk drăm kon pơlei: “Dơnâu Đăk N’ting 1 sơnăm kơ âu bơih, đơ̆ng rŏng kơ hư răm adoi tam mă sơkơ̆t hơdah kơlih ki kiơ răm. Kơyươ noh, inh pơtruh nơ̆r dah sơkơ̆t tơdrong tơm đang kơ noh tơlĕch chă hơmet ming dơnâu đak âu”.

Tơdrong ming hơmet pơnơ̆ dơnâu Đăk N’ting rơđăng đei sơkơ̆t noh kăl tơpă. Mă lei, ƀok Phạm Tuấn Anh, Kơdră Anih Choh jang xa păng Hơtŏk tơring tơrang dêh char Đăk Nông akhan, tŏk bŏk oei đei tơdrong tơsŭl tơsăl păng hơdar lơ̆m chă sơkơ̆t tơdrong tơm adoi nhen ming hơmet dơnâu đak âu. Minh sơnăm kơ âu bơih mă lei adoi tam mă sơkơ̆t hơdah tơdrong tơm rơđăng noh kơlih đơ̆ng yơ. Kiơ̆ kơ ƀok Phạm Tuấn Anh, đei tơdrong mă anih iŏk ming man oei klenh ah tơlĕch sơkơ̆t tơdrong tơm đei răm âu: “Tơdrong tơnap tap hloh noh chă đei anih jang hơlen sơkơ̆t tơnăp, vă iŏk jang tơdrong âu. Lơ̆m tơdrong jang, nhôn hơvơn lơ anih jang truh chă hơlen lăng mă lei đe sư hơlen lăng đang kơ noh jăk đĕch, pơm ăn tơdrong ming hơmet jing adar. Truh khei năr tơjê̆ âu, Viê̆n Khua hŏk hơlen gah pơnơ̆ dơnâu đak drơ̆ng nơ̆r, dang ei adoi pơdrơ̆ng gô kĭ pơkăp pơm jang vă iŏk jang sơnong jang âu”.

Ming man dơnâu mong Đăk N'ting đei kơsô̆ jên asong noh 137 tih hlj, iŏk đơ̆ng jên jang kiơ̆ tơchơ̆t hơmet tŏ ‘mi kial tơplih păng hơtŏk jơk jăl sơnăm 2016 - 2020 păng jên mong tơchơ̆t tơ̆ tơring. Tơdrong jang kơyươ Anih vei lăng dôm tơdrong asong ming man kơ dêh char Đăk Nông pơgơ̆r ming man. Blŭng khei 8/2023, dơnâu rơđăng ah mong ƀenh đak. Jơnŭm pơgơ̆r jang kơ teh đak gah tang găn păng tơjră ‘mi kial đak hơbông pơrăm kơyươ Thư̆ trương Anih tơm Choh jang xa păng Hơtŏk tơring tơrang Nguyễn Hoàng Hiệp, Phŏ Kơdră chĕp kơ̆l hlôi kơtă năm hơlen păng pơgơ̆r chă trong hơmet tenh kuăng adoi nhen hơmet đunh đai kơnh.

Anih jang vei lăng kon pơlei dêh char Đăk Nông adoi hơnơ̆ng tơlĕch chă hơlen sơkơ̆t tơdrong tơm păng hơmet ming, mă lei truh dang ei adoi oei minh hơnih đĕch. Ƀok Hồ Văn Mười, Kơdră Anih jang vei lăng kon pơlei dêh char Đăk Nông akhan, đei tơdrong ưh tơnăp, pơhơi hăm sơnong jang lơ̆m tơdrong hơlen hơmet dơnâu pơnơ̆ đak Đăk N’ting: “Hop tơbăt hăm hla bar chih, pơma lơ ‘măng bơih mă ưh kơ jang, mưh Đăk  N’ting pơyan âu mă hơlih, đei tơdrong răm truh tơdrong hơrih kon pơlei, mŭk drăm noh bu chiu pŭ tơdrong âu. Mă hloh 1 sơnăm kơ âu, truh dang ei pơtơm chă đei anih jang vă hơlen sơkơ̆t, mă hơlen băt ah pơyan ‘mi âu dơ̆ng, jing minh tơdrong kăl kơ pơma”.

Trung ương pơgơ̆r tơtenh, dêh char pơtrŭt chŏng mă tơdrong sơkơ̆t kơlih kiơ đei rơđăng dơnâu Đăk N’ting, xah Quảng Sơn, apŭng Đăk Glong, dêh char Đăk Nông, pơhơi pơhŏ. Lơ̆m kơplah noh, tơdrong hli pơchah hăm dơnâu đak âu noh ƀôh đang măt lơ̆m khei tơm kơ pơyan ‘mi kial, tơdrong hơrih păng mŭk drăm kon pơlei tơ̆ hơla dơnâu đak tŏk bŏk oei ƀơm pơjuă tơhli.