Lơ̆m dôm năr âu ki, tơdrong tơroi găh teh dơdrŏ jăng truh 5 độ richter đei ƀât ‘năr dơ̆ng ‘năr 28/7 dơdrŏ tôch dêh hơnơ̆ng đei kon pơlei bou truh. Mih ma duch nă tơroi dơ̆ng dôm tơdrong mă kơdih kâu ƀôh, atŭm hăm ‘nŏh tơƀôh đon pơngơ̆t găh tơdrong ‘nâu. Mŏ Y Phiếu, kon pơlei oei tơ̆ plei Rô Xia, xăh Đăk Tăng, pơma thoi âu: “Inh kơdâu lĕch tơ̆ ‘ngoăih hơdrol ‘mơ̆i đang kơ ‘nŏh năm chă kon inh dơ̆ng. Kon pơlei blŭng a kŭm tôch hli yoa teh dơdrŏ tôch jăng mă lei đơ̆ng rŏng ‘nŏh rim bơngai chă pơlung băl, chơ̆n jơhngâm, pơtho tơƀôh ăn băl kơna kon pơlei hơđơ̆ng jơhngâm hơlơ̆k dơ̆ng”.

Đơ̆ng rŏng đei teh dơdrŏ, lơ̆m dôm năr âu ki, Khul kơdră pơgơ̆r, khul grŭp tơpôl tơ̆ dôm xăh lơ̆m apŭng Kon Plông, dêh char Kon Tum athei kăn ƀô̆ jur truh tơ̆ rim pơlei, hơlen năng rim tơdrong, hơdai hăm ‘nŏh tơtă ăn kon pơlei kơchăng tơjră hăm rim tơdrong krê mưh đei teh dơdrŏ. Ƀok Nguyễn Văn Bay, Kơdră vei lăng kon pơlei xăh Đăk Tăng, ăn tơbăt, gơnơm iŏk đei nơ̆r tơroi tơtom kơna kon pơlei tơ̆ 11 pơlei lơ̆m xăh huei pă hli tăr văr đơ̆ng teh dơdrŏ: “Đơ̆ng rŏng kơ teh dơdrŏ jăng ‘năr 28/7, hăm tơdrong pơgơ̆r đơ̆ng Anih vei lăng kon pơlei apŭng, xăh pơjing lơ khul jang, krao akŏm dôm bơngai juăt jang găh roi tơbăt, krao hơvơn păng năm hơlen năng rim tơdrong tơ̆ pơlei pơla lơ̆m xăh. Hơdai hăm ‘nŏh khan kơ kon pơlei lê̆ hli, hơnơ̆ng roi tơbăt ăn kon pơlei hơđơ̆ng jơhngâm jang xa”.

Kơchăng tơjră hăm teh dơdrŏ, khei ‘năr âu Anih jang Vật lý plei teh vang jang hơdoi hăm khul kơdră pơgơ̆r apŭng Kon Plông pơgơ̆r lơ ‘măng pơtâp pơhrăm, hơtŏk đon hlôh ăn kon pơlei. Gơnơm thoi noh mă lơ bơngai tơ̆ dôm xăh lơ̆m tơring đei teh dơdrŏ nhen: Đăk Tăng, Đăk Nên, Đăk Ring, Măng Bút, Ngọc Tem… hlôh vao hơdăh ƀiơ̆ găh trong tơjră hăm teh dơdrŏ. Oh Nguyễn Bỉnh Khiêm tơ̆ plei Vi Xây, xăh Đăk Tăng, tơroi dôm tơdrong kăl pơm mưh đei teh dơdrŏ vă vei lăng kơdih kâu păng tơpôl: “Mưh năm hŏk, inh đei thây kô tơ̆ hnam trưng păng khul jang tơ̆ xăh, tơ̆ pơlei roi tơbăt găh trong tơjră hăm teh dơdrŏ. Mưh đei tĕh dơdrŏ ‘nŏh bơ̆n athei mât ngôi hơla kơƀang mă ưh ‘nŏh hơla rih rôm giơng vă huei đei tơmam pơchăh dăh mă bơbŭng hnam tơglơ̆k kơtĭt, vă vei lăng tơdrong arih ăn kơdih bơ̆n”.

Oei oh Y Vỹ (oei tơ̆ xăh Đắk Tăng mơ̆n) ‘nŏh tơroi tơdrong jang kăl đơ̆ng kơdih vă tơgŭm ăn mih ma duch nă băt trong tơjră hăm teh dơdrŏ jĭ: “Kŭm đei bơngai băt mơ̆n mă lei hăm bơngai kră kŭm đei bơngai băt, bơngai ưh kơbăt ‘năi. Nhôn chă tơtă, roi tơƀôh ăn đe sư băt chur mât hơla kơƀang păng kơdâu lĕch tơ̆ anih teh hŏh vă huei pơrăm truh tơ̆ hơkâu jăn kơdih”.

Đơ̆ng khei 4/2021 truh dang ei tơ̆ apŭng Kon Plông, dêh char Kon Tum đei dang 800 ‘măng teh dơdrŏ păng kiơ̆ tơdrong tơchĕng đơ̆ng Anih jang Vật lý plei teh ‘nâu jĭ teh dơdrŏ yoa đơ̆ng bơ̆ găn, mong đak đơ̆ng hnam kơmăy unh điên pơm tơlĕch. Lơ̆m 2 năr âu ki, tơ̆ hơnăp teh dơdrŏ roi krê, roi lơ, păng jăng hlŏh đơ̆ng sơ̆ truh dang ei, ƀok Lê Đức Tín, Phŏ Kơdră vei lăng kon pơlei apŭng Kon Plông, ăn tơbăt, trong jang đơ̆ng apŭng ‘nŏh kơchăng tang găn păng ưh ăn đei đon hli tăr văr lơ̆m tơdrong tơjră hăm teh dơdrŏ: “Nhôn hơnơ̆ng iŏk yoa hla ar chih đơ̆ng Anih jang Vật lý plei teh chih tôm tơdrong vă pơtho tơƀôh, roi tơbăt dơ̆ng ăn kon pơlei kơchăng tơjră hăm rim tơdrong. Pơtho ăn dôm xăh roi tơbăt, krao hơvơn kon pơlei, jur tơ̆ tơroi tơ̆rim pơlei, rim unh hnam vă băt hơdăh păng đei trong tơjră ‘lơ̆ng ƀiơ̆. Pơgơ̆r pơtâp pơhrăm tơ̆ tơring đei teh dơdrŏ đang kơ ‘nŏh tơlĕch jang tơ̆ dôm pơlei nai lơ̆m apŭng. Kiơ̆ đơ̆ng noh, tơgŭm ăn Anih pơgơ̆r jang tơ̆ dôm xăh đei trong jang ‘lơ̆ng mưh đei dơ̆ng teh dơdrŏ”.

Nơ̆r tơroi đơ̆ng Anih roi tơbăt găh teh dơdrŏ păng khan hơdrol đak pŏh yă – Anih jang Vật lý plei teh ăn ƀôh, lơ̆m 2 năr, ‘năr 28 păng 29/7 đei 46 ‘măng teh dơdrŏ tơ̆ apŭng Kon Plông, dêh char Kon Tum. Mă tơpă ăn ƀôh, ‘ngoăih kơ teh dơdrŏ jăng truh 5 độ richter đei ƀât ‘năr dơ̆ng, ‘năr 28/7 pơm dơdrŏ tơ̆ lơ tơring ‘nŏh dôm ‘măng teh dơdrŏ oei đei kon pơlei ưh kơ băt kiơ. Teh dơdrŏ kŭm tam mă pơm tơlĕch hiong răm lơ găh tơmam drăm. Khul kơdră pơgơ̆r păng kon pơlei tơ̆ tơring đei teh dơdrŏ lơ̆m apŭng Kon Plông, dêh char Kon Tum oei hơnơ̆ng kơchăng tơjră hăm rim tơdrong ưh ê đơ̆ng teh dơdrŏ./.