Đe thây kô lăng kăl tơdrong pơtho dơ̆ng tơdrong hlôh vao, akŏm pơhrăm tơdrong gơh pơm ƀai hrĕnh, ƀlep kiơ̆ athei đơ̆ng đê pơlong, tơgŭm đe oh đei tơdrong hơmet ‘lơ̆ng vă yak mơ̆t lơ̆m ‘măng pơlong gĭt kăl âu. Kiơ̆ kơ ƀok Phạm Đăng Khoa, Kơdră Anih vei lăng găh pơtho pơhrăm dêh char Đắk Lắk, sơnăm ‘nâu, lơ̆m dêh char đei hloh 21.000 ‘nu hŏk tro vang pơlong tốt nghiệp jăl 3.

Anih jang hlôi athei dôm hnam trưng đei hŏk tro vang pơlong tốt nghiệp lăp đơ̆ng rŏng kơ pơtôch hŏk ki 2 gô hơdrin hơmet ming tơdrong hlôh vao, pơgơ̆r hơlen lăng tơdrong gơh pơm ƀai kiơ̆ đê pơlong hơlen lăng mă Anih tơm vei lăng găh pơtho pơhrăm tơlĕch ăn vă klăih song hŏk tro pơhrăm ming mă lăp. Hăm tơdrong hơmet ăn ‘lơ̆ng đơ̆ng hrôih, anih vei lăng găh pơtho pơhrăm dêh char Đắk Lắk hơmĕng ‘măng pơlong Tốt nghiệp jăl 3 sơnăm 2024 đe oh gô iŏk đei điêm lơ hloh.