Hơdah, rim khei, rim anih jang unh hơyuh lơ̆m dêh char adoi đei ƀai chih, video pơdah gah tơdrong vei sơđơ̆ng unh hơyuh, tơbang lơ̆m website kơ anih jang unh hơyuh adoi nhen dôm anih jang ƀăo, rađiô rapor trung ương păng tơ̆ tơring; tơlĕch rapor gah sơđơ̆ng unh hơyuh tơ̆ dôm xah, phương đơ̆ng 2 truh 4 ‘măng rim khei.

Kiơ̆ rok mạng tơpôl Zalo păng facebook, Unh hơyuh Đăk Lăk adoi tơlĕch tơroi pơtho gah tơdrong yua unh hơyuh sơđơ̆ng păng mong ƀiơ̆ unh hơyuh truh dôm jĭt rơbâu bơngai yua. Hăm trong chă tơroi vei sơđơ̆ng unh hơyuh hăm hloh 62.000 hla bar asong, anih jang hlôi chih ƀônh vă kon pơlei ƀônh hlôh vao păng iŏk yua.

Đơ̆ng khei 10/2023, vang jang lơ̆m khul chă hơlen kơ anih jang gah tơdrong tang găn păng pĭt unh xa, Anih jang Unh hơyuh Đăk Lăk hlôi jang atŭm tơroi vei sơđơ̆ng unh hơyuh truh dôm anih jang, tơ-‘ngla bơngai jang, vă tơjur unh xa đôh lơ̆m tơdrong pơm jang.