Tơring sơlam đơ̆ng Gia Lai hăm dôm dêh char đei kơjung 418 km, hơnih ưh lơ ‘lơ̆ng. Đơ̆ng rŏng 8 sơnăm kĭ tơchơ̆t jang hơdai, rim khŭl lĭnh kơpal hlôi pơgơ̆r hloh 1.800 ‘măng dăr joang, tơchă druh rôp, chă ƀôh 565 ‘măng pơm glăi luơ̆t bri ‘long. Akŏp hơgăt bri đei phă hloh 45.000 m2, iŏk vei hloh 600 m3 ‘long păng sek phak hloh 2 ti hlak jên. Tơring sơlam đơ̆ng 3 apŭng Krông Pa, Sông Hinh păng Krông Năng ‘noh hơnih tơtŏ đơ̆ng tơdrong phă bri, mă loi ‘noh jĭ hăm Hơnih vei lăng cham char bri brăh Ea Sô.

Tơ̆ hop akŏm, dôm bơngai tang măt akhan, tơdrong tơm hơnhăk truh tơdrong phă bri ‘noh jĭ yua đơ̆ng trong jang tơgŭm oei ưh kơ ‘lơ̆ng,trong sek phak tam mă kĕ tơhli, tơdrong kơ kĕ tơrăn đơ̆ng dôm tơ ‘ngal bri. Tơdrong vei lăng bri oei lơ long nol, athei dôm tơring, dôm anih jang kăl kơ hơnơ̆ng jang kiơ̆ tơpăt dôm tơdrong athei, tơchơ̆t đơ̆ng Đảng păng khŭl kơdră teh đak, jang hơdai kơjăp hloh păng jang kiơ̆ hrơ̆ch dôm trong jang.