Khei ‘năr âu ki, mă đơ̆ng dôm anih jang kơpal adrin tang găn mă lei kơsô̆ bơngai yoa ma túy ưh kơ đei jur, tơtă ƀôh roi tŏk dơ̆ng hăm lơ tơdrong krê. Tơdrong tơm ‘nŏh yoa đon hlôh vao đơ̆ng kon pơlei, mă loi jĭ tơ̆ khul mơlôh găh tơdrong răm đơ̆ng ma túy tam mă tôm.

Pơma tơ̆ lêh kĭ pơkăp, Phŏ Kơdră tơm vei lăng pơtho pơhrăm Ngô Thị Minh pơma hơdăh: Bơ̆ jang ‘lơ̆ng tơdrong roi tơbăt, pơtho tơƀôh tang găn tơdrong yoch, pơm glăi lơ̆m tơpôl păng pơm glăi khôi luơ̆t, mă loi găh tơdrong tang găn ma túy tơ̆ hnam trưng ưh lăp ƀơm ‘lơ̆ng truh tơ̆ khul thây kô păng hŏk tro, sinh viên đĕch mă oei ƀơm ‘lơ̆ng truh tơ̆ jơ̆p tơpôl hai.