Kơtă lơ̆m khei bơ̆ jang tơm vang tơjră tang găn tơdrong yoch ƀât Tết 2025, khul jang kơpal tơ̆ apŭng Đức Cơ, dêh char Gia Lai chă ƀôh 2 tơdrong yoch, rôp vei 4 ‘nu bơngai chơ chuĕn ôn 220 kĭ kơmlăi. Trung tá Nguyễn Lê Hồ Tân Ảnh, Kơdră vei lăng Khul linh kanh sat dăr hơlen tơdrong Pơm yoch – Mŭk drăm - Ma túy (Công an apŭng Đức Cơ) ăn tơbăt:

“Đei lơ kơmlăi chơ tĕch ôn đơ̆ng Campuchia mât tơ̆ Việt Nam. Trong đe tĕch mơdro ‘nŏh, dôm khul pơm glăi iŏk yoa mang tơpôl vă chă tĕch mơdro. Dôm bơngai pơm yoch iŏk kơmlăi tăh lơ̆m ƀao, mă ưh ‘nŏh tăh lơ̆m kơthŭng gre ô tô, gre hang, ôn lơ̆m gre vă chơ chuĕn. Đei lơ nơ̆r tơroi đơ̆ng kon pơlei tôch trŏ. Jang hơdoi hăm dôm anih jang kơpal, khul grŭp, linh vei lăng tơring sơlam, hải quan vă băt dôm bơngai chơ chuen, tĕch mơ dro ôn kơmlăi vă phă hŭt, rôp vei bơngai pơm yoch.”

Tơ̆ tơring sơlam Gia Lai, dôm khul jang kơpal oei jang hơdoi tôch kơjăp, vei lăng ‘lơ̆ng tơdrong sơđơ̆ng tơpôl, tang găn dôm tơdrong pơm glăi luơ̆t. Đại tá Nguyễn Văn Nghị, Phŏ Chính ủy Anih chĕp kơ̆l khul linh Ƀô đô̆i vei lăng tơring sơlam dêh char Gia Lai, ăn tơbăt, khul linh vei lăng tơring sơlam kŭm hăm công an dôm apŭng tơ̆ tơring sơlam Đức Cơ, Chư Prông, Ia Grai, rôp, thu iŏk hlŏh 1.000 kĭ kơmlăi:

“Lơ̆m dôm sơnăm âu ki, tơring sơlam kơ dêh char Gia Lai hơnơ̆ng đei tơdrong chơ tĕch ôn kơmlăi lơ̆m dôm khei vă truh têt, Ƀô đô̆i vei lăng tơring sơlam dêh char Gia Lai tơlĕch lơ trong tang găn đe tĕch mơdro ôn, hơlĕnh pơdăr mưh tĕch tơmam. Khei ‘năr âu ki đei kon pơlei tơgŭm kơna anih nhôn rôp đei 1,2 tơdrong tĕch mơdro ôn. Nhôn tang găn pơđĭ dôm tơdrong yoch ‘nâu vă tơring sơlam kơ dêh char Gia Lai gơ̆h sơđơ̆ng ‘lơ̆ng”./.