Chi ƀô̆ thôn 10A đei Đang ƀô̆ tơring Ea Kly, apŭng Krông Pach, dêh char Dak Lăk rơ̆ih iung jang hơdrol tơ iung pơjing trong jang “Chi ƀô̆ 4 ‘lơ̆ng”. Kiơ̆ kơ ‘noh, chi ƀô̆ kăl jang keh đang rim trong tơlĕch jang: Jang keh đang ‘lơ̆ng tơdrong jang chinh trĭ, hop akŏm jơnei ‘lơ̆ng, tơgoăt tơgoăl kơjăp, kang ƀô̆ ‘lơ̆ng, đang viên ‘lơ̆ng. Vă jang đei tơdrong au, ƀok Trần Ngọc Quang, Bí thư Chi ƀô̆ thôn 10A tơbăt: Khul kơdră chĕp pơgơ̆r chi ƀô̆ hlôi hơlen kiơ̆ dôm tơdrong lơ̆m tơring păng tơdrong jang ‘lơ̆ng kơ rim đang viên hop akŏm pơma dơnuh, drơ̆ng mĭnh nơ̆r pơjao tơdrong jang hơdăh ăn rim bơngai jang kiơ̆. Lăp đơ̆ng rŏng 3 khei tơlĕch jang, tơdrong jang kơ chi ƀô̆ hlôi bơ̆ jang ‘lơ̆ng, jơhngơ̆m đon hlôh vao kơ rim đang viên đei hơtŏk, iung jang kiơ̆ jơnei hơnăp jang chĕp pơgơ̆r găh atŏk tơ iung mŭk drăm-tơpôl kơ tơring. “Chi ƀô̆, khul kơdră chĕp pơgơ̆r chi ƀô̆ hop akŏm tơlĕch tơdrong tơchơ̆t pơtăm pơkao jih trong pơjing đei măt lăng ‘lơ̆ng koeng ƀôt, tơlĕch jang kiơ̆ pơlăp camera sơđơ̆ng tơ̆ dôm hơnih tơm. Pơjing đei tơdrong lui kiơ̆ kơjăp đơ̆ng kon pơlei hăm chi ƀô̆ adoi nhen sơđơ̆ng jơhngơ̆m jang sa vă atŏk jang sa iŏk yua kơjăp, sơđơ̆ng hơrih sa ăn kon pơlei lơ̆m tơring”.

Đảng ƀô̆ tơring Ea Sin, apŭng Krông Ƀŭk, dêh char Dak Lăk đei 13 chi ƀô̆ hăm 150 ‘nu đang viên. Lăp đơ̆ng rŏng đei Đảng ƀô̆ apŭng rơih ăn jang hơdrol trong jang “Chi ƀô̆ 4 ‘lơ̆ng”, Đảng ủy tơring hlôi pơjing, tơlĕch trong pơprŏ jang, pơgơ̆r pơm lêh iung jang kiơ̆, kĭ pơkăp tơdrong pơting dih băl tơ iung pơjing “Chi ƀô̆ 4 ‘lơ̆ng” tơ̆ 4 chi ƀô̆ ‘noh: Chi ƀô̆ Quân sự tơring, Chi ƀô̆ buôn Ea Káp, Chi ƀô̆ buôn Ea Kring hăm Chi ƀô̆ buôn Ea Sin. Vă tơgŭm ăn rim chi ƀô̆ jang kiơ̆ ‘lơ̆ng tơdrong jang, ƀok Vũ Văn Tuấn, Bí thư Đảng ủy tơring Ea Sin, apŭng Krông Ƀŭk, dêh char Dak Lăk tơbăt: atŭm hăm pơjao tơdrong jang ăn rim kơdră chĕp pơgơ̆r đang vei lăng, lăng hơlen, pơtho tơbăt ăn rim chi ƀô̆ tơlĕch jang pơlong năng trong jang, Đảng uỷ tơring hlôi tơlĕch jang kiơ̆ phân mêm chih akŏm dôm tơdrong jang đang viên ăn rim chi ƀô̆ vă pơm hơtŏk tơdrong hop akŏm ‘lơ̆ng hơ iă.“Đảng ƀô̆ tơring Ea Sin hlôi tơlĕch jang kiơ̆ phân mêm chih akom hơnăn tơdrong jang đang viên vă jang kiơ̆ ‘lơ̆ng bơ̆ jang tơplih kơsô̆ lơ̆m bơ̆ jang tơ iung pơjing đang. ‘Moi kiơ̆ tơlĕch jang pơlong năng hlôi hơnhăk đei jơnei hơ iă. Mă kăl hloh nhen rim tơdrong tơbăt ăn, nơ̆r pơma pơtôch đơ̆ng đang uy, đơ̆ng kơdră kơpal jei đei tơlĕch jang kiơ̆ tơtom ăn rim chi ƀô̆. Đơ̆ng noh rim chi ƀô̆ tơlĕch jang ăn rim đang viên vă lăng hơlen, băt hơdăh dôm tơdrong jang hơdrin ‘lơ̆ng hơ iă lơ̆m hop akŏm chi ƀô̆ tơ̆ tơring lơ̆m tơdrong tơ iung pơjing chi ƀô̆ 4 ‘lơ̆ng”.

Đơ̆ng mă tơlĕch jang kiơ̆ trong jang “Chi ƀô̆ 4 ‘lơ̆ng”, 5 lơ̆m 5 chi ƀô̆ đei rơih jang kiơ̆ tơ̆ Đang ƀô̆ apŭng Krông Pach, dêh char Dak Lăk hlôi tơlĕch jang ‘lơ̆ng tơdrong jang pơting dih băl trŏ lăp hăm tơdrong yan au tơ̆ tơring, tơ̆ hơnih  jang. Ƀok Trần Quốc Vĩnh, Kơ iĕng Ƀĭ thư Đảng apŭng Krông Pach, dêh char Dak Lăk tơbăt, đơ̆ng rim tơdrong jang au hlôi pơjing đei tơdrong jang pơting dih băl kơtang lơ̆m Đang ƀô̆ apŭng, tơgop pơm hơtŏk trong chĕp pơgơ̆r, jơhngơ̆m pran iung tơjră đơ̆ng hơnih jang đảng păng tơdrong bơ̆ jang ‘lơ̆ng kơ rim kang ƀô̆, đang viên.“Lơ chi ƀô̆ hlôi pơgơ̆r hơlen, tơ iung pơjing tơdrong tơchơ̆t trŏ lăp hăm dôm tơdrong lơ̆m hơnih kơ dih. Mă ƀar ‘noh tơklep kơjăp hăm hơnăp jang kơ bơngai đang viên, mă kăl hăm bơngai chĕp kơ̆l. Kơ yuơ lơ loh kơna pơjao tơdrong jang ăn rim đang viên trŏ lăp hloh, ‘lơ̆ng hloh. Đơ̆ng noh tơdrong hop akŏm, mă hơdăh ‘noh 4 tơdrong mă nhôn tơlĕch ăn ‘lơ̆ng hơ iă hloh”.

Vă tơdrong jang pơting dih băl tơ iung pơjing “Chi ƀô̆ 4 ‘lơ̆ng”, “Đang ƀô̆ tơring 4 ‘lơ̆ng” đei tơlĕch jang hơnơ̆ng pơjing đei iung jang kiơ̆ kơtang, Khul kơdră chĕp pơgơ̆r Đảng dêh char Dak Lăk hlôi pơgơ̆r Pơm lêh tơlĕch jang kiơ̆ pơting dih băl lơ̆m đĭ đăng đang ƀô̆. 20 Đang ƀô̆ găh Hơnih Đảng dêh char Dak Lăk hlôi kĭ pơkăp pơting dih băl tơ iung pơjing “chi ƀô̆ 4 ‘lơ̆ng”, “Đảng ƀô̆ tơring 4 ‘lơ̆ng” jăl jang 2023 - 2028. Đơ̆ng au, Khul kơdră chĕp pơgơ̆r rim hơnih Đảng apŭng, thĭ xah, pơlei tơm păng rim hơnih đảng găh Hơnih Đảng dêh char tơ iung pơjing trong pơprŏ jang, pơgơ̆r chih hơnăn vang jang kiơ̆ pơting dih băl “chi ƀô̆ 4 ‘lơ̆ng”, “Đảng ƀô̆ 4 ‘lơ̆ng”. Rim sơnăm hơlen hơdăh păng hơnơ̆ng lang să trŭh đei jing tơdrong pơkăp ‘lơ̆ng kơ chi ƀô̆, đang ƀô̆ tơring. Ƀok Y Biêr Niê, Kơ iĕng kơdră chĕp pơgơ̆r Hơnih Đảng dêh char Dak Lăk tơbăt:“ Tơ iung pơjing chi ƀô̆ 4 ‘lơ̆ng, đảng ƀô̆ 4 ‘lơ̆ng ‘nau lăp hơyak blŭng a mă lei jei hlôi jing trong kơnăl vă ăn rim chi ƀô̆, rim đảng ƀô̆ lăng hơlen dơ̆ng rim tơdrong jang kăl tơlĕch jang kiơ̆ lơ̆m sơnăm 2024 păng dôm sơnăm đơ̆ng rŏng dơ̆ng”

Đơ̆ng trong jang jơnei jang pơlong năng “Chi ƀô̆ 4 ‘lơ̆ng”, lơ tơring lơ̆m dêh char Dak Lăk tŏk bŏk roi năr roi lang să truh hăm đĭ đăng chi ƀô̆, đang ƀô̆. ‘Nau đei lăng jing trong jang kăl hloh vă pơjing đei tơplih kơtang lơ̆m pơm hơtŏk tơdrong chĕp pơgơ̆r, jơhngơ̆m pran iung tơjră kơtang đơ̆ng hơnih jang Đảng păng pơm hơtŏk bơ̆ jang ‘lơ̆ng kơ khul kang ƀô̆, đảng viên kơ dêh char trŏ lăp hăm tơdrong pơkoĕl lơ̆m bơ̆ jang chăl hle.