Lơ̆m ‘năr hơheo tơngiĕt kơ pơyan phang Tây Nguyên, tơ̆ cham hơnih Pơtho pơhrăm tơblăh kơ Ƀô̆ đô̆i vei lăng sơlam teh đak dêh char Dak Lăk tơ̆ tơring sơlam teh đak Krông Na, apŭng Buôn Đôn, mơjĭt ‘nu bơngai ‘nao mơ̆t pơm ƀô̆ đô̆i hơngŭr chă hơpuih hơmet pơ ‘lơ̆ng, tung ‘long pơm hơdrơ̆ng dur hơnih pơhrăm tơblăh; lơ̆m hnam hop akom, lơ bơngai ƀô̆ đô̆i hle anai mơ̆ng pơtho tơbăt chinh trĭ, tơdrong pơkăp oei sa păng khăm hơlen jơhngơ̆m jăn. Ƀô̆ đô̆i hle Lê Thành Huy (18 sơnăm), oei lơ̆m ưpơlei tơm Buôn Ma Thuột, ‘nao mơ̆t pơm ƀô̆ đô̆i sơnăm 2024 tơbăt, dôm năr blŭng mơ̆t pơm ƀô̆ đô̆i ‘noh tôch kơ hlêng hlang, ƀlŏk kơ ŭnh hnam, mă lei đei kơdră kơpal păng bôl boăl lăng ba kơna hlôi sơđơ̆ng jơhngơ̆m năm hŏk pơhrăm tơblăh: “Mơ̆t lơ̆m Hơnih pơtho pơhrăm tơblăh, ĭnh đei rim đe ‘nhŏng Tiểu đội trưởng, Trung đội trưởng hơlêm, pơtho tơbăt ăn trong oei sa nhen pih hơbĕn ao, hơpuih hnam, chơ̆p khăn hơbĕn ao, pai por ‘nhot, pơm kiơ̆ tơdrong pơkăp ... kiơ̆ trong joăt kơ Ƀô̆ đô̆i. Dang ei ba hlôi sơđơ̆ng jơhngơ̆m, iung năm hŏk pơhrăm tơblăh nhen găh pơhrăm khul, pơhrăm byoh, pơhrăm tơblăh, prăh phao kơ yuơ Tiểu đoàn tơlĕch ăn.”

Ƀô̆ đô̆i hle Nguyễn Xuân Điền (24 sơnăm), pơlei tơring Ninh Diêm, thĭ xăh Ninh Hòa, dêh char Khánh Hòa jei mơ̆t pơm ƀô̆ đô̆i ‘măng mă au păng đei tơmơ̆t ăn lơ̆m Hơnih pơtho pơhrăm tơblăh kơ Ƀô̆ đô̆i vei lăng sơlam teh đak dêh char Dak Lăk tơbăt, ƀă hăm ‘nhŏng sơ̆ jei pơm ƀô̆ đô̆i mơ̆n. Hưch hanh hơmanh bơnê găh tơdrong joăt joe kơ khul ƀô̆ đô̆i, mă đơ̆ng tŏk bŏk bơ̆ jang lơ̆m hơnih jang tơmang pơhiơ̆ hăm kon jên khei vă jê̆ 10 triu hlak jên lơ̆m 1 khei, ‘nhŏng oei chih hơnăn apĭnh mơ̆t pơm ƀô̆ đô̆i: “Yak truh khei năr hŏk pơhrăm tơblăh, ba hơdrin chơ̆n jơhngơ̆m mă ‘lơ̆ng vă pơhrăm kiơ̆ keh đang tơdrong pơjao. Ĭnh ‘meh vă gô đei jing mĭnh ‘nu bơngai ƀô̆ đô̆i kơ Ƀok Hô, hơdrin đĭ ai plang jơhngơ̆m iĕ ioch đơ̆ng kơ dih ăn pơlei pơla teh đak”.

Pơyan krao mơ̆t pơm ƀô̆ đô̆i sơnăm 2024 au, Hơnih pơtho pơhrăm tơblăh kơ Ƀô̆ đô̆i vei lăng sơlam teh đak dêh char Dak Lăk đei pơjao pơtho ăn 190 ‘nu ƀô̆ đô̆i hle, lơ̆m au 70 ‘nu ‘noh oei tơ̆ Dak Lăk, 120 ‘nu oei tơ̆ dêh char Khánh Hòa. Đại úy Lê Anh Vũ Niê K'đăm - Đại Đội trưởng Tiểu đoàn tơbăt, đĭ đăng ƀô̆ đô̆i hle sơnăm au đe sư đei jơhngơ̆m pran jăng, hŏk kơjung hloh dôm sơnăm hơdrol, kơ yuơ lơ loh tơdrong rơbot dôm tơdrong pơtho pơhrăm gô ƀônh ƀiơ̆. Tiểu đoàn jei hlôi hơmet ăn tôm tơdrong ăn ‘măng pơtho pơhrăm ‘nao. “Rim tơdrong pơtho pơhrăm tơblăh kăl nhen: Pơhrăm khul, kih thuơ̆t iung tơblăh, tơdrong pơtho 3 ‘măng đôh ‘noh AK-71, klơ̆m găr năt 71, ngoi đôh 71… dôm tơdrong au hơnih hlôi hơmet tôch kơ ‘lơ̆ng. Nhôn hlôi pơjao tơdrong jang ăn rim bơngai pơjing trong pơtho pơhrăm vă jang ‘lơ̆ng ăn tơdrong jang pơtho pơhrăm tơblăh. ‘Ngoăih kơ ‘noh, bơ̆ jang hơmet ăn găh cham pơhrăm, hơnih pơhrăm prăh phao hlôi iung jang keh đang bơih.”

Lơ̆m 47 sơnăm pơjing atŏk tơ iung, Hơnih pơtho pơhrăm tơblăh kơ Ƀô̆ đô̆i vei lăng sơlam teh đak dêh char Dak Lăk hlôi pơtho pơhrăm ăn 72 ‘măng, pơjao ăn Ƀô̆ đô̆i vei lăng sơlam teh đak rim dêh char Dak Lăk, Gia Lai, Kon Tum, Đak Nông, Khánh Hòa, Bình Định păng Quảng Ngãi, năm jang vei lăng sơđơ̆ng sơlam kơ Teh đak. Atŭm hăm ‘noh, rơbau ‘nu ƀô̆ đô̆i hmŏ tơ̆ tơring jei hlôi pơhrăm, năm iung jang vei lăng sơlam teh đak kơ Teh đak.

Kiơ̆ đơ̆ng Thiếu tá Phạm Kiều Hưng - Kơ iĕng kơdră chĕp pơgơ̆r Hơnih au tơbăt, jang kiơ̆ joăt joe kơ hơnih, pơyan krao tơmơ̆t pơm ƀô̆ đô̆i sơnăm 2024 au, vă sơđơ̆ng ăn rim bơngai ƀô̆ đô̆i hle oei sa ‘lơ̆ng hơ iă, hưch hanh hŏk pơhrăm, Đảng ủy, Khul kơdră chĕp pơgơ̆r Hơnih pơtho pơhrăm tơblăh pơjing Tơdrong tơchơ̆t, trong pơprŏ vă jang, pơjing khul sơng tơmơ̆t, pơtho pơhrăm ăn ƀô̆ đô̆i hle, sơđơ̆ng trong jang “Tôm tong, trŏ lăp, kơjăp ‘lơ̆ng”. Thiếu tá Phạm Kiều Hưng tơbăt: “Kiơ̆ tơdrong pơjao ăn Khul kơdră chĕp pơgơ̆r Ƀô̆ đô̆i vei lăng sơlam teh đak dêh char Dak Lăk, đơ̆ng blŭng pơyan ‘noh Đảng ủy, Khul kơdră chĕp pơgơ̆r Hơnih jang hlôi sơkơ̆t hơdăh ‘nau ‘nŏh tơdrong jang gĭt kăl hloh păng hlôi tơlĕch jang dăr lăng hơlen tơdrong jang hơmet ăn găh trong pơtho pơhrăm kơ Đảng, hơnih oei sa, pơdơ̆h pơdei păng hơnih cham pơhrăm tơblăh ăn ƀô̆ đô̆i hle iŏk đei jơnei kơtang hloh”.

Khei ‘năr Dak Lăk lơ̆m pơyan puih, pơkao chôh rang tơbŭk tơbăk jơ̆p mir pơgar, bri kông, adoi jing pơyan phang roi kơtang hloh. Rim ƀô̆ đô̆i hle kơ Hơnih pơtho pơhrăm tơblăh kơ Ƀô̆ đô̆i vei lăng sơlam teh đak dêh char Dak Lăk hŏk pơhrăm tơblăh tơ̆ hơnih pơhrăm lơ̆m kơ ‘năr tŏ hlơ hlĕng dang ŭnh chrông. Mă lei hăm jơhngơ̆m đon mơlôh, ‘nau jing tơdrong pơhrăm kăl hloh vă đei jing jơhngơ̆m đon kơ bơngai ƀô̆ đô̆i vei lăng sơlam teh đak, yak truh jang keh đang tơdrong jang pơjao vei lăng năng tông tơring sơlam teh đak kơ Teh đak lơm rim tơring năm bơ̆ jang.