‘Nâu jing ‘măng năm tơmang mă blŭng đơ̆ng Kơdră Kuôk hô̆i Bulgaria truh Việt Nam đơ̆ng rŏng jê̆ 12 sơnăm; jing anih hơdah kăp gĭt lơ̆m tơdrong jang tơbôl Việt Nam-Bulgaria, mă kăl noh ah Kuôk hô̆i 2 teh đak ‘nao kĭ pơkăp păng jang kiơ̆ Hla bar pơkăp jang hadoi. Tơdrong jang tơbôl đơ̆ng Kuôk hô̆i 2 teh đak hơnơ̆ng đei hơtŏk ‘lơ̆ng. Ƀar pah hơnơ̆ng asong khul kơpal năm hơpong dih băl, pơtoi pơma đam, jang hadoi păng tơgŭm dih băl lơ̆m dôm tơdrong hop akŏm ngĭ viê̆n lơ̆m tơring păng lơ̆m kơpal teh mă Kuôk hô̆i 2 teh đak atŭm tơrĕk truh nhen Jơnŭm jang Ngĭ viê̆n apŭng plenh teh (IPU), Hop akŏm Jang hadoi Ngĭ viê̆n Á-Âu (ASEP)...

‘Măng năm tơmang đơ̆ng Kơdră Kuôk hô̆i Bulgaria truh Việt Nam kơtă lơ̆m dôm năr blŭng kơ sơnăm 2024 tơƀôh tơdrong lăng tơgĭt, băt ‘mêm păng đon bơnôh ‘lơ̆ng đơ̆ng jơnŭm pơgơ̆r păng kon pơlei Bulgaria hơnơ̆ng asong ăn Việt Nam hăm sơnong jang kơ minh teh đak boăl juăt đunh sơnăm, lui ngeh, tơguăt jing minh lơ̆m dôm teh đak jang hadoi kăp gĭt hloh kơ Bulgaria tơ̆ tơring Đông Nam Á.