Pơgê 8/6, pơma pơtôch jơ apinh jet, Kơdră Kuô̆k hô̆i Vương Đình Huệ akhan: Tơdrong apinh jet đei pơgơ̆r tơpăt ‘lơ̆ng, tôch hơiă, pơm ăn lơ bơngai tăh hla păng kon pơlei lơ̆m tĕh đak tơrĕk truh.

Tơ̆ hop akŏm âu, đei 454 ‘nu bơngai tang măt Kuô̆k hô̆i chih măt vang apinh jet, 112 ‘nu bơngai tang măt Kuô̆k hô̆i đei apinh jet, 49 ‘nu bơngai tang măt Kuô̆k hô̆i iung pơma pơjăh vă pơm hơdăh dôm tơdrong mă bơngai tang măt tơrĕk truh, hơnơ̆ng tơƀôh hơdăh ‘nâu jĭ trong dăr lăng tih, đei yoa ‘lơ̆ng đơ̆ng Kuô̆k hô̆i.

Jơ apinh jet tơƀôh hơdăh đon jang tơnăp, tơl tơblang tôch rơđăh, tơlĕch đei lơ trong jang ‘lơ̆ng mă lei vă gơ̆h đei jơnei ‘lơ̆ng dăh mă ưh ‘nŏh oei gô mơ̆ng đơ̆ng tơdrong jang kiơ̆ nơ̆r pơkăp, nơ̆r hơngăh đơ̆ng Khul kơdră tĕh đak păng dôm bơngai jang lơ̆m Khul kơdră tĕh đak hai.