Pơm ƀơk hla ar teh hơdrom băl oei jing tơdrong đei ƀôh tôch lơ tơ̆ dêh char Đắk Nông. Mă lei, tơdrong sek tơlang pơdui đunh pơm ăn kon pơlei tơƀâp lơ tơdrong pơmat tat păng pơm tơlĕch lơ tơdrong tơgar băl, tôch tơtŏ đon. Kiơ̆ đơ̆ng jur dăr lăng, ƀok Lưu Văn Trung, Kơdră Jơnŭm pơgơ̆r kon pơlei dêh char Đắk Nông kŭm chih iŏk lơ nơ̆r pơma đơ̆ng bơngai tăh hla tơroi găh tơdrong pơm hla ar teh hơdrom băl.

Tơdrong ‘nâu yoa đơ̆ng lơ tơdrong, đơ̆ng ‘ngoăih păng đơ̆ng lăm hai mă lei tơdrong kăl pơma ‘nŏh, trong sek tơlang tơ̆ 1,2 tơring tam mă lăp, ƀât lăp đei hloi đon jang ưh kơ tơnăp. Tơl nơ̆r apinh ăn dôm bơngai tang măt Jơnŭm pơgơ̆r kon pơlei dêh char, ƀok Nguyễn Văn Hiệp, Kơdră Anih vei lăng Tơmam drăm păng cham char Đắk Nông akhan, hlôi đei nơ̆r pơtho vă sek tơlang dôm hla ar teh pơm hơdrom băl bơih. Kiơ̆ kơ ‘nŏh, anih jang kơpal athei iŏk pơdreu păng pơm, ƀơk dơ̆ng hla ar teh ‘nao mă lăp hăm yăn âu.