Chĕp tơ̆ ti hla ar set hơlen pham, khăm hơlen plei nuih, siêu âm đơ̆ng rŏng kơ tơdrong khăm jơhngâm pran yoa khul đe ƀak si Hnam pơgang Nội tiết trung ương  pơgơ̆r tơ̆ Tơring 4 Khul linh đak dơsĭ, mŏ Phạm Thị Thoa, hơkăn 1 ‘nu kăn ƀô̆ oei bơ̆ jang tơ̆ tơring 4 Khul linh đak dơsĭ ƀôh tôch sơđơ̆ng lơ̆m jơhngâm. Đunh kơ âu 5 khei, gơnơm đei khăm hơlen jĭ đơ̆ng khul ƀak si Trung ương hơdai hăm khul linh quân y kơ Khul hơmet jĭ 486, Tơring 4 Khul linh đak dơsĭ mă mŏ băt kơdih kâu đei jĭ pơlei kơnê̆ ƀât hơlŏng, đơ̆ng rŏng kơ răih hơmet, jơhngâm pran mŏ Thoa đĭ sơđơ̆ng bơih.

Mŏ Thoa tơroi: “Hmă hmă đa năm khăm tôch hơtăih, dang ei đe mih tơ̆ Hnam pơgang jur tơ̆ âu khăm, lăp 1 pơgê đĕch đang bơih, tơdăh ưh ‘nei kơtĕch 1 giĕng ‘mơ̆i khăm đang. Tơdrong jang đơ̆ng đe ƀak si truh tơ̆ âu tôch gĭt kăl, vang chă tơgŭm ăn kon pơlei Khánh Hòa tơ̆ âu.”

Lơ̆m dôm năr pơgơ̆r khăm jơhngâm pran, Trung tá Nguyễn Hữu Nhất, Vei lăng khul jang quân y  Sư đoàn 377, Khul linh tơblăh tang găn gre păr hơnơ̆ng kŭm hăm đe linh nai đei măt đơ̆ng hrôih tơ̆ Khul hơmet jĭ 486: “Adrol kơ khăm hơlen tơ̆ âu, khul linh đĭ iŏk set hơlen pham bơih, dôm kơsô̆ set hơlen đei lơ bơngai đei tơdrong jĭ tơ̆ klak, đei sĭk, pham rơmă. Kiơ̆ đơ̆ng khăm hơlen âu đe ƀak si khăm tôch hơlen, roi tơƀôh tôch rơđăh, đe kăn ƀô̆ khul linh tôch sơđơ̆ng jơhngâm hăm tơdrong jang gơ̆h hơgei đơ̆ng đe ƀok thây pơgang.”

Đĭ lơ sơnăm ‘nâu bơih, kơdră chĕp kơ̆l Hnam pơgang Nội tiết trung ương kŭm hăm khul jang truh dôm jĭt ‘nu ƀak si chĕp kơ̆l dôm khoa đơ̆ng Hnam pơgang năm khăm, hơmet jĭ ăn đe kăn ƀô̆, linh lơ̆m Kơđông linh Cam Ranh păng kon pơlei tơ̆ phường Cam Nghĩa păng apŭng Cam Lâm, dêh char Khánh Hòa. Kăl loi, lơ̆m sơnăm 2020, Hnam pơgang tơgŭm man Anih khăm đa khoa, Hnam pơgang Lữ đoàn 101, Tơring 4 Khul linh đak dơsĭ tơ̆ xăh Cam Thành Bắc, apŭng Cam Lâm. Truh dang ei, anih khăm kơ Hnam pơgang Lữ đoàn 101 đĭ jing anih gơnang tôch sơđơ̆ng hăm đe kăn ƀô̆, linh păng kon pơlei tơ̆ tơring mưh đei tơdrong jĭ jăn.

Ƀok Cao Quốc Khánh kon pơlei tơ̆ xăh Cam Bình, pơlei tih Cam Ranh akhan: “Ƀak si tơ̆ âu jang tôch tơnăp, adrin vei lăng ‘lơ̆ng ăn bơngai jĭ, roi tơƀôh rim lăm, rim anih, khei yơ inh kŭm năm pơtŏ huyêt ap tơ̆ âu. Ƀât băt Lữ đoàn 101 đei hnam pơgang ‘nŏh ‘nâu jĭ anih mă blŭng inh năm truh mưh đei tơdrong lơ̆m jơhngâm pran. Truh tơ̆ âu tôch sơđơ̆ng jơhngâm.”

Đơ̆ng anih jang blŭng a oei tam mă tôm tơmam, hăm kơsô̆ bơngai jĭ 1 sơnăm lăp dang 3 rơbâu ‘nu, đơ̆ng rŏng đei tơgŭm găh tơdrong jang, tơmam kơmăy kơmŏk đơ̆ng Hnam pơgang Nội tiết Trung ương, rim sơnăm, Hnam pơgang Lữ đoàn 101 đĭ khăm, hơmet jĭ ăn 18 rơbâu ‘nu bơngai jĭ. Găh noh dơ̆ng, dôm hnam pơgang tơ̆ trung ương ăn lơ ƀak si truh tơgŭm, pơtho tơƀôh ki thuơ̆t, pơm hơtŏk đon hlôh vao, jang gơ̆h hơgei ăn đe y ƀak si tơ̆ Hnam pơgang, hăm jơhngâm đon yak hơdoi păng tơgŭm băl đe linh găh Khul linh đak dơsĭ Việt Nam oei pơm kơđông tơ̆ dôm achon kông lơ̆m đak dơsĭ hơtăih hơtŏ kơ teh đak, đei vei lăng ‘lơ̆ng găh tơdrong jang pơgang, kiơ̆ đơ̆ng noh, roi hơmet kơjăp tơdrong mât mĭnh ƀơ̆r đon, ‘mêm băl đơ̆ng khul linh hăm kon pơlei Việt Nam.