Mĭnh năr hơtuch khei 9, gre ôtô chơ nhôn kiơ̆ trong pơtrui vei lăng sơlam teh đak năm truh tơ̆ hơnih gak vei lăng kơsô̆ 1 găh Kơđông Ƀô̆ đô̆i vei lăng sơlam teh đak Ia Mơ. Yak lơ̆m bri kơdrơ̆ng, hơnơ̆ng chă pơglăn lăng bri ‘long ‘lơ̆ng rŏ nhen lĕ hiơt hiong hloi nơ̆r tơbăt đơ̆ng Chinh trĭ viên Nguyễn Đức Hùng găh hơnih gak đei ư̆ akhan 3 ưh: Ưh kơ đei trong hơyuh điên thoăi, ưh kơ đei đak sŏ nhă, ưh kơ đei ŭnh hơyuh. Sơng nhôn ‘noh dôm kang ƀô̆, ƀô̆ đô̆ hlôi gak vei lăng tơ̆ au đĭ vă jê̆ 1 giĕng. Lăng muh măt bu bu jei jơmăng hơrăng, jơ̆ng ti tơkhĭl tơkhăl nhen lĕ ‘long krăk bŏk bŏk bri kông Tây Nguyên đĕch.

Trung tá Rơ Lan Khúi, Kơdră Khul bơ̆ jang dăr lăng găh Kơđông Ƀô̆ đô̆i vei lăng sơlam teh đak Ia Mơ pơma akhan, tơring sơlam teh đak pơyan au,’nhŏng oh ƀô̆ đô̆i bơ̆n oei đei đak chă sŏ nhă, mưh truh pơyan phang, tŏ dang lĕ ŭnh phang pơjrang lơ̆m pơsŭn pơm ăn bu bu jei lĕch đak pơ-uh pơ-ang hơnhul hơnhăr. Trung tá Rơ Lan Khúi pơma tơbăt jơhngơm đon:“Oei tơ̆ hơnih gak au tôch mơmat tat, ŭnh hơyuh ưh kơ đei, đak pơyan ‘mi hum tơ đak kroong, đak glung. Pơyan phang nhen lĕ lơ liĕo hloi.’Meh vă krao điên thoăi ăn kon hơkăn, pơma dơnuh bơ̆ jang hăm kơđông ‘noh măh kơdau năm truh tơ̆ trong sơlăh pêng ƀơ̆t km kơsô̆ 0 ‘noh mă gơ̆h chă krao. ‘Nhŏng oh bơ̆n jĭ hơdrin đĕch bơih, tơdrong jang Đảng păng Teh đak pơjao nei kơna bu bu jei sơđơ̆ng jơhngơ̆m iung jang.”

         Hăm kang ƀô̆ ƀô̆ đô̆i bơ̆ jang tơ̆ hơnih gak vei lăng, đak oei gĭt kăl hloh kơ măih. Đe sư chă drŏng mong rim kơtoh ‘mi ro đơ̆ng pơbŭng kem vă mong răk chă pai sa kơ ‘năr. Đak kơƀăh kơƀôch, ŭnh hơyuh oei kơƀăh hloh dơ̆ng. Đĭ đăng jĭ gơnang lơ̆m kmăi đôh chă tơ̆k hơdăh tơ̆ gơmăng đĕch, đei ‘măng lăp iŏk yua ŭnh ƀin. ‘Nao au, hơnih gak đei pơlăp ăn ŭnh hơyuh jơ̆ng ‘năr mă lei tŏk bŏk lơ̆m khei ‘năr hơlen dang 2 khei kơ au.

"Sa tơ̆ hơdrơ̆r, tep lơ̆m bri" gleh hrat mơmat tat ‘noh lơ loh, mă lei rim kang ƀô̆ ƀô̆ đô̆i Kơđông Ia Mơ ling lang chă hơlêm dih băl akhan: “Lơ̆m jơhngơ̆m đon kơ bơngai ƀô̆ đô̆i ưh kơ đei tơdrong tơnap tap lăp đei jơhngơ̆m đon kơrŭn đĭ ai”. Prăt nar, lăp kơtĕch bơ̆ jang năm pơtrui sơlam teh đak, ƀô̆ đô̆i kơlong jơk brŏk vih dơ̆ng tơ̆ hơnih gak jang sa, vei lăng năng tông pơgar ‘nhot kơ dih. Thiếu tá Trần Văn Hạnh, kơđông Ƀô̆ đô̆i vei lăng sơlam teh đak Ia Mơ tơbăt:“Jang sa tơ̆ au pơtăm ‘nhot lơ̆m pơyan ‘mi, Pơyan phang ưh kơ gơh ôh. Rong kon tơrong ‘noh rong iĕr, rong ka, rong pơbe. Tơdrong sŏng sa jei sơđơ̆ng ‘lơ̆ng hơ iă”.

          Tok bok bri kông kơdrơ̆ng ưh khan lăp kơtơ̆ng sem bri brăh asi mă lei oei kơtơ̆ng kơtak kơ iĕr rong, kơmau jơk ƀlĭk kơ pơgar ‘nhot hla hơnoăn, tơneh. Hơnih oei rong pơbe đei 20 tŏ vă pơjing ‘nhĕm ‘nhot kơ ‘năr ăn ƀô̆ đô̆i. Thượng tá Nguyễn Đức Hùng,Chính trị viên Kơđông Ia Mơ tơbăt, Kơđông Ia Mơ vei lăng năng tông 12km 600 met trong sơlam teh đak hăm Campuchia. Jăl sơlam teh đak mă kơđông iŏk vei lăng năng tông tim mă chă chĕng, hơtơ̆p hơdrơ̆ng tơbăt sơlam kơna tơdrong jang vei lăng pơm tơm tơ-‘ngla groi teh tôch mơmat tat. Mă lei hăm jơhngơ̆m đon vei lăng tơ-‘ngla teh đak, kang ƀô̆ ƀô̆ đô̆i Kơđông Ia Mơ ling lang sơkơ̆t hơdăh jơhngơ̆m đon, trong jang pran kơtang, yak hloh tơnap tap vă jang keh đang tơdrong jang đei pơjao. Thượng tá Nguyễn Đức Hùng pơma hơdăh:“Tơdrong oei sa tơ̆ hơnih gak au oei ƀĕnh ƀang tơnap tap, mă lei ưh kơ đei bơngai bu jang ưh tơnăp, ưh kơ bơngai bu pơjăh pơjăng mưh pơjao năm bơ̆ jang tơ̆ hơnih gak sơlam teh đak. Kơdră Đảng, Kơdră kơđông hơlêm, păng pơlơ̆h dih băl năm jang tơ̆ rim hơnih tơnap tap, ưh kơ lê̆ bơngai bu bơ̆ jang đunh khei ‘năr.”

Yak hloh ưh kơbăt dôm yơ pơyan tŏ phang adoi nhen pơyan ‘mi, tơring sơlam teh đak Ia Mơ ling lang đei ƀô̆ đô̆i vei lăng sơlam teh đak gak lăng-đe sư nhen lĕ khêl bơ̆ng pang tang măt vei lăng năng tông tơdrong hơrih sa sơđơ̆ng dơ̆ng kơjăp tơ̆ tơring ‘măng jang kơ Teh đak.