Gơmăng hei, 18/3, Trung ương Đoàn Thanh niên cộng sản Hồ Chí Minh pơm lêh tơbăt 94 sơnăm Năr pơjing Đoàn TNCS Hồ Chí Minh păng hơpăh tơmam Lý Tự Trọng sơnăm 2025. Pơma tơ̆ jơ pơm lêh, ƀok Nguyễn Trọng Nghĩa Kơdră chĕp kơ̆l Anih pơtho tơƀôh păng krao hơvơn kon pơlei Trung ương athei jơhnơr mơlôh hơnơ̆ng năm hơdrol lơ̆m tơdrong tơchĕng hơlen, tơmât yoa, atŏk tơiung khoa hŏk, kơmăy kơmŏk.

Ƀok Nguyễn Trọng Nghĩa athei Đoàn thanh niên Cộng sản Hồ Chí Minh năng kăl tơdrong pơtho pơhrăm đon tơchĕng kăch mang, arih xa tơpăt ‘lơ̆ng ăn jơhnơr mơlôh, pơtho tơƀôh, tưk tơiung jơhngâm đon adrin đơ̆ng kơdih, hơđơ̆ng jơhngâm jang tŏk, hưch hanh kơ hơdrĕch hơdrung păng hơpơi ‘mĕh bơ̆ jang plang pơyơ̆r ăn teh đak; hơtŏk hơnăp jang đơ̆ng druh dăm lơ̆m tơdrong vang vei lăng đon tơchĕng đơ̆ng Đảng, tơjră, tơgang găn dôm đon tơchĕng ưh kơ trŏ vă pơm tơblĕk jơhngâm; pơjing pơtho pơhrăm khul kăn ƀô̆ đoàn rơgei, đei jơhngâm đon ‘lơ̆ng. Tơ̆ lêh tơbăt, 100 ‘nu kăn ƀô̆ đoàn rơgei chơt hơiă đei pôk hơpăh tơmam Lý Tự Trọng. ‘Nâu jĭ dôm bơngai chĕp kơ̆l khul druh dăm hơnơ̆ng bơ̆ jang tơnăp, gơ̆h hơgei vă tơlĕch jang ‘lơ̆ng tơdrong jang đoàn păng khul hơioh.