‘Nou jĭ mĭnh lơ̆m dôm tơdrong pơgơ̆r lơ̆m Pơm lêh chehphe Buôn Ma Thuột ‘măng mă 9 sơnăm 2025, kơ kuh chơt hơ iă 50 sơnăm năr jơnei rơngei Buôn Ma Thuột. Đơ̆ng mir pơgar să ‘măng mă blŭng ou, ‘long chehphe hlôi lang să jơ̆p tơring Tây Nguyên, hlôi jing ‘long pơtăm tơm dơnơm hơnhăk đei tơdrong hơrih sa ‘lơ̆ng hơ iă ăn kon pơlei. Lơ̆m dêh char Dak Lăk hrei ou đei dang 210.000ha chehphe, hăm plei iŏk đei rim sơnăm hloh 550.000 tân găr. Tĕch mơdro chehphe tơ̆ teh đak đe kơ dêh char sơnăm 2024 iŏk đei 1 ti 200 triu USD. Ƀok Nguyễn Thiên Văn - Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk tơbăt, sơnăm blŭng dêh char pơgơ̆r Jơnŭm kơtrăi chehphe, jĭ mĭnh lơ̆m dôm tơdrong kăl kơ Pơm lêh chehphe Buôn Ma Thuột, tơgop tơƀôh tơbăt tơmam drăm choh jang sa ăn tơmoi.