Tơring jang pơlong kơsô̆ 3, đei Jơnŭm pơgơ̆r jang kơ 13 anih jang đảng dêh char, pơlei tơm tơring Tŏk Bŏk  – Tây Nguyên. Kơyuơ Jơnŭm pơgơ̆r jang đang rpơlei tơm Đà Nẵng pơm kơdră. Sơnăm 2023, Jơnŭm pơgơ̆r jang kơ dôm dêh char, pơlei tơm lơ̆m Tơring jang pơlong hlôi pơm hơdah, chih akŏm tơdrong jang lơ̆m sơnăm, rơih dôm sơnong jang dơnơm, tơlĕch tơdrong jang hơdah kiơ̆ rim khei, rim jăl vă akŏm pơtrruh pơm jang nhen tơchơ̆t tơlĕch.

Tơdrong jang pơ-‘lơ̆ng đảng, hơtŏk đảng viên đei tơring jang tơrĕk kăp gĭt, hlôi đei lơ trong jang ‘lơ̆ng vă hơtŏk tơdrong akŏm chi ƀô̆. Rim tơring hlôi tơlĕch pơm ‘nao gah sơkơ̆t đảng viên vei sơđơ̆ng trŏ, chă hơlen lăng tơtom hơmet dôm tơdrong tam mă ‘lơ̆ng, vă kơhret gah ki lươ̆t tơchơ̆t, vă ăn tơdrong jang kan ƀô̆, đảng viên roi năr roi ‘lơ̆ng hloh.