Mă hơdăh, găh păih Jơnŭm pơgơ̆r kon pơlei, dôm bơngai đei tăh kơ phiê̆u lui ‘noh jĭ Kơdră păng 2 Phŏ kơdră Jơnŭm pơgơ̆r kon pơlei, kŭm hăm 4 kơdră khŭl jang. Păih Anih vei lăng kon pơlei dêh char, Kơdră Anih vei lăng kon pơlei dêh char, kŭm hăm 1 phŏ Kơdră, 25 ‘nu bơngai jang lơ̆m Anih vei lăng kon pơlei ‘noh jĭ dôm Kơdră vei lăng anih jang păng dôm kơdră khŭl jang. Pơtôch ăn ƀôh, đei 21/27 ‘nu đei kơ sô̆ kơ phiê̆u lui lơ hloh 50%. Lơ̆m noh, ƀok Hồ Văn Niên- Bí thư Anih jang Đảng dêh char, Kơdră Anih vei lăng kon pơlei dêh char Gia Lai đei kơsô̆ kơ phiê̆u lui lơ hloh ‘noh jĭ 62/64 kơ phiê̆u. Ưh kơ đei bơngai tang măt hơ yơ đei kơsô̆ kơ phiê̆u lui tŏ sĕt hloh 2/ 3 akŏp kơ sô̆ kơ phiê̆u.

Kŭm tơ̆ ‘măng hop akŏm âu, Jơnŭm pơgơ̆r kon pơlei dêh char Gia Lai hlôi set hơlen tơlĕch ăn păng pơdrơ̆ng kiơ̆ hla ar pơtruh ăn kơ ƀok Hồ Văn Điềm- Bơngai jang lơ̆m Khŭl chĕp kơ̆l pơgơ̆r Anih jang Đảng dêh char, Kơdră Mặt trận tổ quốc Việt Nam dêh char, Bơngai jang lơ̆m Khŭl jang mŭk drăm - jên jang Jơnŭm pơgơ̆r kon pơlei dêh char, bơngai tang măt Jơnŭm pơgơ̆r kon pơlei dêh char Gia Lai pơdơh kơ pơm bơngai tang măt Jơnŭm pơgơ̆r kon pơlei dêh char.