Lơ̆m 6 khei blŭng sơnăm 2024, dêh char Gia Lai iŏk đei tŏk mŭk drăm hloh 3%; thuê̆ ăn hơnih mong jên bơ̆ jang hloh 3.300 tih hlak jên; tĕch mơdro tơ̆ teh đak đe đei iŏk yua hơ iă, hăm iŏk đei 525 triu USD, jơnei 70% trong tơlĕch jang lơ̆m sơnăm; đei 3 apŭng păng 96 tơring hlôi jang keh đang rim tơdrong pơkăp  tơring tơrang ‘nao.

Hrei ou, tơ̆ dêh char đei hloh 255.000ha ‘long pơtăm rim kơ loăi đei jang sa kiơ̆ pơkăp ‘lơ̆ng VietGAP, GlobalGAP, 4C, Organic, Rainforest Alliance, FLO păng 227 mã kơsô̆ tơring pơtăm ăn 9.600ha ‘long pơtăm. Adoi, đei 92 trong jang rong kon tơrong đei drơ̆ng nơ̆r ăn tơmơ̆t jên jang. Mă lei, dêh char oei tơƀơ̆p tơnap tap nhen: tơdrong tơlĕch kon jên teh đak tơmơ̆t jang oei hiơ hiơ̆, ‘nao jơnei hloh 23% lơ̆m akŏp kon jên tơmơ̆t jang 4.300 ti hlak jên; trong pơkăp pơtăm ‘long bri tim mă keh đang nhen hlôi tơlĕch ăn. ‘Măng hop akŏm mă 19 Jơnŭm vei lăng kon pơlei dêh char Gia Lai pơgơ̆r lơ̆m 3 năr, gô lăng hơlen, tơchơ̆t hăm 32 trong pơjing tơdrong tơchơ̆t kơ yuơ Khul kơdră chĕp pơgơ̆r Jơnŭm vei lăng kon pơlei dêh char păng Hơnih vei lăng kon pơlei dêh char pơtruh ăn.