Năr au jei jing Năr Apŭng plĕnh teh đe hơ ioh, mưh chă pơma dơnuh găh mŭk drăm tơpôl adoi nhen găh ‘ngoăih Kuô̆k hô̆i, lơ kơdră tang măt tơlĕch nơ̆r apĭnh athei ăn rim kơdră, hơnih jang kăl đei trong jang jơnei tang găn tơdrong hil hơreh teh dong đe hơ ioh tơ̆ hnam trương, pơm pơrăm păng đei tơdrong sar bar rơka tơ̆ đe hơ ioh, mă kăl ‘nŏh tang găn glơ̆k lơ̆m pơyan pơdơ̆h hŏk.

Kiơ̆ đơ̆ng lơ kơdră tang măt, lơ̆m dôm sơnăm tơjê̆ au, tơdrong pơm glăi pơrăm tơ̆ đe hơ ioh, mă kăl tơdrong hil hơreh tĕh dong đe hơ ioh tơ̆ hnam trương, tơ̆ ŭnh hnam, mă đơ̆ng hlôi dă ƀiơ̆ mă lei oei đei lơ tơdrong hơmơt kơtang. Rim kơdră tang măt akhan, kăl atŏk kơtang tang găn hơlau tơdrong hil hơreh teh dong, pơm pơgŏ đe hơ iŏh lơ̆m rim tơdrong pơgơ̆r joh ayŏ kơdŏ soang, đă ƀŏng lŏng tơplŏng kơdau păng tơmang pơhiơ̆; tơlĕch jang hơdrol tơ iung pơjing hơnih pơchơt pơhiơ̆, rim tơdrong pơgơ̆r joh ayŏ kơdŏ soang, đă ƀŏng lŏng tơplŏng kơdau ăn hơ ioh, mă kăl rim tơring tơnap tap găh mŭk drăm-tơpôl. Mĭnh ƀar ‘nu kơdră tang măt hơlen, hơnăp jang tơgoăt dih băl ƀar păh ŭnh hnam, hnam trương păng tơpôl lơ̆m pơtho pơhrăm tơdrong joăt, jơhngơ̆m đon, tơdrong erih sa ăn hŏk tro kăl lăng kơjăp hloh dơ̆ng. Rim hơnih pơtho pơhrăm kăl hơnơ̆ng atŏk kơtang bơ̆ jang pơrô̆ pơrôp, pơjing đei tơdrong oei sa ‘lơ̆ng hơ iă hloh ăn hơ ioh.

Pơgê au (1/6), Kuô̆k hô̆i hơnơ̆ng chă pơma dơnuh tơ̆ hnam hop akŏm găh lăng hơlen tơmơ̆t dơ̆ng tơdrong jơnei pơtôch jang kiơ̆ trong pơprŏ jang atŏk tơ iung mŭk drăm-tơpôl păng kon jên jang teh đak sơnăm 2022; tơdrong jang kiơ̆ trong pơprŏ jang atŏk tơ iung mŭk drăm-tơpôl păng kon jên jang teh đak dôm khei blŭng sơnăm 2023; Chă pơma dơnuh tơ̆ hnam hop akŏm găh trong bơ̆ jang tơmơ̆t jên jang dơ̆ng ăn Hơnih mong jên Choh jang sa păng Atŏk tơ iung tơring tơrang Việt Nam.