Vă jê̆ 300 ‘nu bơngai tang măt ‘noh kơdră chĕp kơ̆l dôm anih jang tơgŭm tơdrong jang tơroi tơbăt hăm ƀơ̆r găh Khŭl tơroi tơbăt kơ Anih jang Đảng dêh char, anih jang đảng pơlei tơm, anih jang đảng găh trung ương, dôm khŭl jang chĭnh trĭ tơpôl, khŭl tơroi tơbăt rim tơring lơ̆m teh đak năm akŏm. Hop akŏm ‘măn lơ jơ roi tơbăt tơdrong jang găh tơdrong ASEAN, pơtôch 1,2 tơdrong jang tơbôl gĭt kăl đơ̆ng kơdră chĕp kơ̆l Đảng, Teh đak păng dôm trong vă jang tih đơ̆ng tơdrong jang tơbôl tơ̆ hơnăp kơnh.

Ƀok Phan Xuân Thuỷ, Phŏ Kơdră Anih tơroi tơbăt Trung ương athei tơ̆ hơnăp kơnh, dôm Khŭl tơroi tơbăt kơ dôm anih jang đảng dêh char, anih jang đảng pơlei tơm, anih jang đảng kŭm hăm bơngai tơroi tơbăt rim tơring akŏm tơroi tơbăt jrŭ să lơ̆m kang ƀô̆, đảng viên păng rim răih kon pơlei găh dôm jơnei ‘lơ̆ng hăm tơdrong hơtŏk tơiung kơ teh đak; lăng truh tơdrong jang tơroi tơbăt Tơdrong tơchơ̆t kơsô̆ 35 ‘năr 14/6/2024 đơ̆ng Anih tơm Chĭnh trĭ găh Hop akŏm đảng bộ rim tơring yak truh Hop akŏm bơngai tang măt lơ̆m teh đak ‘măng mă XIV kơ Đảng kŭm kăl kơ đei pơjing trong tơlĕch jang mă ‘lơ̆ng vă tơroi tơbăt, mă loi ‘noh jĭ tơdrong iŏk nơ̆r tơgop đơ̆ng kang ƀô̆, đảng viên păng kon pơlei găh chih hơmet dôm hla ar kăl pơtruh ăn hop akŏm.