Ƀok Lê Trường Sơn, Phŏ Kơdră Jơnŭm pơgơ̆r kon pơlei apŭng Tân Phước- tơring Đồng Tháp Mười kơ dêh char Tiền Giang tơroi:  “Ĭnh tôch kơ ‘mêm kơ eng kơ Tổng Bí thư, ĭnh ‘meh ‘nhơ̆m hloi. Tổng Bí thư jĭ bơngai gơh hơgei, đei jơhngơ̆m đon ‘lơ̆ng - hŏk tro Ƀok Hồ hlôi tơƀôh găh jơhngơ̆m đon ‘lơ̆ng, jĭ bơngai Cộng Sản vei đei đon tơpăt. Tổng Bí thư jĭ bơngai jang chĭnh trĭ vei kơjăp đei trong jang ‘lơ̆ng, đon tơchĕng kơjăp, tơ jră sa pơ gơ̆m pơ jĭp vă vei lăng đon tơchĕng ‘lơ̆ng, kơ tơ̆ng tơ roi ‘meh lĕch đak măt.”

Ƀok chuơ Thích Minh Phước, pơgơ̆r vei lăng hnam chuơ Liên Hoa tơ̆ xăh Xuân Đông, apŭng Chợ Gạo, dêh char Tiền Giang kŭm hăm dôm bơngai lui phât lơ̆m dêh char tôch sơ ‘ngon mưh kơtơ̆ng bơngai chĕp kơ̆l teh đak lôch hơchăng: "Hăm kơdih kâu inh, jĭ 1 ‘nu bơngai lui Phât mưh kơtơ̆ng ƀok Tổng Bí Thư Nguyễn Phú Trọng lôch. Mă băt ‘nŏh jĭ tơdrong ưh gơ̆h ver ver đơ̆ng kră sơ̆ truh dang ei mă lei hăm kơdih kâu inh ƀôh sơ ‘ngon tơpă păng tôch ‘mêm hmach mưh teh đak hiong lê̆ 1 ‘nu bơngai chĕp kơ̆l gơ̆h hơgei, đĭ jơhngâm hăm Đảng, hăm kon pơlei. Ƀok pơvih ăn teh đak truh đĭ chăl arih. ‘Mêm kơ eng tơpă. Inh ƀlŏk hơnơ̆ng nơ̆r Ƀok pơma sơ̆: "Tơdrong arih lăp 1 vât đĕch, athei arih thoi yơ mă lăp vă huei ‘mêm hmach, huei kơ ơh đơ̆ng dôm tơdrong jang kơlĕl, kơ ƀlep, ưh kơ ‘lơ̆ng. Jên lơ vă pơm kiơ? Lôch bơih rŏ khan gơ̆h chĕp ba. Grih, bưng ai ‘nŏh jĭ tơdrong kăp gĭt hlŏh". Mă đơ̆ng ƀok đĭ lôch hơchăng kon pơlei Việt Nam bơih ră mă lei tơdrong jang kăch mang păng dôm nơ̆r pơma tôch trŏ, ‘lơ̆ng hơiă đơ̆ng ƀok ăn kon pơlei chăl hrei ‘nâu păng ning mônh kơnh oei kăp gĭt hơnơ̆ng. Apĭnh kŭp kơ̆l ƀât hơnăp pơhngol ƀok Tổng Bí Thư Nguyễn Phú Trọng ”.

Tơroi găh Tổng Bí thư Nguyễn Phú Trọng, ƀok Nguyễn An Chiến, Đảng viên pơdơh hưu tơ̆ phường Cốc Lếu, pơlei tơm Lào Cai akhan, Tổng Bí Thư Nguyễn Phú Trọng jĭ 1 ‘nu bơngai hŏk tro tôch kơ hơgei kơ ƀok Hồ, jĭ 1 ‘nu bơngai cộng sản tơpăt, bơ̆jang đĭ jơhngơ̆m kơdih yua kơ kăp gĭt đơ̆ng  Đảng, plang jơhngơ̆m ăn teh đak,  hơdrĕch hơdrŭng. Mă loi ‘noh, lơ̆m tơdrong jang đơ̆ng kơ dih, Tổng Bí Thư Nguyễn Phú Trọng jĭ 1 lơ̆m dôm bơngai chĕp kơ̆l hơgei hloh lơ̆m iung jang tang găn sa pơ gơ̆m pơjĭp, ưh kơ ‘lơ̆ng. “Ƀơ̆t iŏk đei kơtơ̆ng tơroi ƀok lôch hơchăng nhôn chhưu kơ jơhngơ̆m, hmach ‘mêm ƀơ̆t Đảng păng teh đak bơ̆n hiong lê̆ 1 ‘nu bơngai kon gơh hơgei, 1 ‘nu bơngai chĕp kơ̆l kơtang đei dôm tơchĕng tih, 1 ‘nu bơngai chinh trĭ, khŭl lĭnh, tơbôl tôch kơ hơgei lơ̆m tơdrong jang kach mang Việt Nam”.