Khei 4 pơyan phang Tây Nguyên tŏ hlơ hlĕng tôch dêh. Tơ̆ cham pơtâp pơhrăm, dôm jĭt ‘nu kăn ƀô̆, linh lơ̆m Anih Kanh sat cơ động Công an dêh char Đắk Lắk oei adrin pơtâp pơhrăm. Hăt hot sut đak pơ uh pơ ang, Trung úy Hứa Văn Hòa tơroi: “Kơdih kâu inh kŭm hăm đĭ đăng kăn ƀô̆, linh jang lơ̆m Khul linh kanh sat cơ động hơnơ̆ng pơtâp pơhrăm, hơmet jơhngâm đon chinh trĭ. Nhôn hơnơ̆ng pơtâp hŏk chok, ki thuơ̆t tơblăh, kŭm nhen gơ̆h iŏk yoa rim tơmam, phao kơtoang vă kơchăng tơblăh, iŏk jang ‘lơ̆ng rim tơdrong đei pơjao.”   

Kơchăng tơblăh lơ̆m chăl ‘nao, tơdrong jơnei ‘nao hlŏh jĭ khei 6/2023, khul linh kanh sat cơ động Đắk Lắk kŭm hăm dôm khul linh vang rôp pơđĭ dôm bơngai pơm kơnê̆, pơlôch bơngai tơ̆ Cư Kuin. Kiơ̆ Thượng tá Vũ Thành (77 sơnăm) – sơ̆ng pơm Yŏng Kanh sat cơ động công an dêh char Đắk Lắk, Đắk Lắk pơma hơdrô̆, Tây Nguyên pơma atŭm jĭ tơring tôch gĭt kăl găh tơdrong sơđơ̆ng teh đak, hơnơ̆ng đei lơ khul hơyăt chă trong phă ngơ̆r.

Hlŏh 30 sơnăm bơ̆ jang lơ̆m Khul linh kanh sat cơ động, tơƀâp lơ tơdrong pơmat tat, tơdrong mă ƀok Vũ Thành ƀlŏk dêh hlŏh jĭ ‘măng năm ƀa trui sơnăm 1977 rôp Hoàng Huân, 1 ‘nu yŏng Fulro tơ̆ apŭng Đắk Mil: “Hoàng Huân đơ̆ng xăh Đức Minh, Đức Mạnh kŭm hăm hlŏh 20 ‘nu Fulro kơdâu mât tơ̆ bri hơdai hăm Trung đoàn 64 Fulro đơ̆ng Y K’lơng pơgơ̆r. Lu sư chă trong tơblăh, tơblơ̆ hŭt khul kơdră pơgơ̆r apŭng Đắk Mil. Nhôn pơgơ̆r 2 ‘măng năm ƀa trui, 5h jơ pơgê ‘năr 6/4/1977, nhôn klăih song pơm 2 khul ƀatrui đơ̆ng pơgê truh ‘năr dơ̆ng ‘nŏh ƀôh khul hơyăt. Inh kơtơ̆ng Radio yoa hơyăt pơih, băt lu sư tơ̆ noh kơna nhôn năm truh, inh ƀôh Huân ‘nŏh prăh hloi 3 găr, Huân ƀơm ƀrâm pơ̆k, đei nhôn rôp hloi. Pĭnh hơlen Hoàng Huân ‘nŏh nhôn gơ̆h tơblăh phă đĭ khul lu sư păng dôm jĭt ‘nu bơngai lĕch kŭp kơ̆l yơ̆r ti đĭ.”

Thượng tá Cao Tiến Phu – Yŏng kanh sat cơ động Công an dêh char Đắk Lắk, tơroi, 50 sơnăm âu ki, kŭm hăm bơ̆ jang ‘lơ̆ng tơdrong vei lăng kơjăp tơdrong sơđơ̆ng ăn rim anih jang chinh trĭ, mŭk drăm, tơpôl gĭt kăl kơ trung ương păng tơring, khul linh kanh sat cơ động Đắk Lắk vang iung tơblăh phă đei lơ tơdrong yoch krê hơmơt nhen tơtông klĕ, pơlôch bơngai, ma túy…, vei kơjăp tơdrong sơđơ̆ng tơ̆ tơring. Dôm sơnăm đơ̆ng rŏng kơ tơblăh rơngei, khul linh pơgơ̆r kơhrĕng ‘măng ƀa trui Fulro, pơlôch păng rôp đei kơhrĕng ‘nu bơngai, thu iŏk lơ phao kơtoang, tơmam pơyoa ăn khul linh păng hla ar chih đei ƀơm truh. Hơdrô̆ tơdrong pơm kơnê̆ pơlôch bơngai ‘năr 11/6/2023 tơ̆ Cư Kuin, đe kăn ƀô̆, linh druh rôp đei 11 ‘nu bơngai pơm kơnê̆, thu iŏk lơ phao kơtoang, tơmam pơyoa ăn khul linh. 

Thượng tá Cao Tiến Phu ăn tơbăt, kăn ƀô̆, linh tơ̆ âu hơnơ̆ng pơtâp pơhrăm, hơtŏk đon jang chinh trĭ păng gơ̆h hơgei, kơchăng tơblăh hăm rim tơdrong yoch kơplăh rim jơnăr: “Nhôn hơnơ̆ng vei kơjăp tơdrong juăt kơtang nuih mơng păng dôm tơdrong gĭt kăl đei chih răk đơ̆ng rim jơhnơr chĕp kơ̆l Anih kanh sat vei lăng adrol sơ̆, kanh sat cơ động hrei ‘nâu păng hơnơ̆ng pơtho tơƀôh jơhngâm đon nuih mơng ăn kăn ƀô̆, linh lơ̆m khul linh. Nhôn pơgơ̆r pơtâp pơhrăm ăn kăn ƀô̆, linh roi đunh jang roi gơ̆h hơgei, đang kơ ‘nŏh pơtâp pơhrăm, pơjing lơ trong jang vă sek tơlang rim tơdrong krê, khŏm vei lăng kơjăp ‘lơ̆ng tơdrong sơđơ̆ng tơ̆ tơring.”

Dôm sơnăm âu ki, hăm dôm tơdrong jơnei iŏk đei, Anih kanh sat cơ động - Công an dêh char Đắk Lắk chơt hơiă đei Đảng, Teh đak hơpăh ăn hơnăn Khul linh tơblăh kơtang nuih mơng kơ kon pơlei, Mê đai tơblăh jơnei dơ̆ng mă mônh, Mê đai khul linh kơtang dơ̆ng mă pêng păng lơ tơmam hơpăh kăp gĭt nai hai. Kăn ƀô̆, linh kanh sat cơ động Công an dêh char Đắk Lắk hrei ‘nâu oei ‘moi kiơ̆ tơdrong juăt kơtang nuih mơng đơ̆ng chăl adrol, tơgăl jĭ “khêl pơsei” vei lăng kơjăp tơdrong sơđơ̆ng tơ̆ tơring păng vei lăng ‘lơ̆ng tơdrong hiôk chơt ăn kon pơlei dôm hơdrĕch hơdrung tơ̆ Đắk Lắk.