Kiơ̆ đơ̆ng Đại tá Nguyễn Minh Khánh, Kơ iĕng Kơdră chĕp pơgơ̆r, Kơdră pơchoh trong jang Bro Kanh sat đak dơsĭ 3, ‘nau jĭ tơdrong jang tôch ‘lơ̆ng hơ iă vă ƀar khul tơƀơ̆p dih băl, hŏk pơhrăm dih băl găh kĕ hơmet pơ ‘lơ̆ng dôm tơdrong sar bar păng tang găn tơdrong sar bar tơ̆ đak dơsĭ, tơgŭm ăn kang ƀô̆, sĩ kuan ƀar teh đak băt hloh dơ̆ng găh trong bơ̆ jang; adoi pơhrăm jơhngơ̆m đon kơchăng, tơchăr hơ iă pơm hơtŏk jơhngơ̆m đon chĕp pơgơ̆r lơ̆m jang kiơ̆ rim tơdrong jang đei pơjao.

Kiơ̆ đơ̆ng Chuẩn tướng SUDHIR RAVINDRAN, Kơdră Khul linh vei lăng Jih đak dơsĭ Ấn Độ, ‘nau jĭ jơ rơvơn vă ƀar păh tơƀơ̆p, hŏk pơhrăm dih băl, tơbăt dih băl tơdrong jang hơ iă yan au lơ̆m bơ̆ jang kiơ̆ khôi luơ̆t tơ̆ đak dơsĭ. Đơ̆ng au tơgop pơm hơtŏk tơdrong tơgoăt tơgoăl, jang hơdoi, hlôh vao dih băl păng lui kiơ̆ dih băl kơjăp ƀar păh khul Kanh sat đak dơsĭ Việt Nam păng Khul lĭnh Vei lăng jih Đak dơsĭ Ấn Độ lơ̆m khei năr kơnh.