Ƀât blŭng khei 3, tơ̆ xăh Đông, apŭng Kbang, dêh char Gia Lai đei 1 ‘măng unh xa yoa đơ̆ng đe sŏh hơmet mir pơgar, pơm ăn unh xa truh 5ha kơtao đĭ vă kŏh bơih. Ƀok Nguyễn Đăng Chung – Kơdră vei lăng kon pơlei xăh Đông – tơroi đơ̆ng rŏng kơ unh xa, khul kơdră pơgơ̆r xăh hlôi pơma nuh hăm Hnam kơmăy rŏl kơtao pơm sĭk An Khê răt iŏk hơdrol kơtao kon pơlei đei unh xa, gơnơm thoi noh mă gơ̆h pơm tơjur ƀiơ̆ hiong răm. Tơdrong tơm pơm ăn unh xa đei akhan, yoa đơ̆ng rŏng kơ kŏh kơtao, unh hnam ƀok Hồ Văn Vĩnh tơ̆ thôn 2, xăh Đông, kuơih pôi hơmet hla kơtao, vă sŏh hơmet pơgar kơtao unh hnam. Mă lei, ƀât sŏh hơmet pơgar kơtao, ƀok Vĩnh ưh kơchăng lê̆ unh xa mơmrok truh tơ̆ pơgar kơtao hnam ƀok Đinh Tấn Đức păng Nguyễn Ngọc Công tơtil pơgar sư, pơm ăn vă jê̆ 5ha kơtao 2 unh hnam âu unh xa pơđĭ.

Tơ̆ hơnăp tơdrong ‘noh, dôm năr ‘nâu, kon pơlei oei kŏh iŏk kơtao. Ƀok Trần Văn Tuấn, tơ̆ xăh Nghĩa An, apŭng Kbang, dêh char Gia Lai tơroi: Kơtao sơnăm ‘nâu ‘lơ̆ng, jang đei lơ, kơjă tĕch măk, mă lei kon pơlei tôch pơngơ̆t yoa hli đei unh xa kơtao yoa dang ei oei mât lơ̆m pơyan tŏ phang dêh hlŏh: “Hnam nhôn dang ei oei đei dang 3.200 tân kơtao dơ̆ng. Lơ̆m khei ‘năr tŏ tôch dêh ‘nŏh dôm tơring đei phang pơđang athei chong pơih trong chĕng găn, kơtao yơ kră ‘nŏh kŏh hơdrol, oei dôm pơgar oei đei đak ‘ngôm, huei krê unh xa ‘nŏh kŏh đơ̆ng rŏng”.

‘Năr 6-3 âu ki, kon pơlei tơ̆ plei Kruối Chai, xăh Yang Bắc, apŭng Đak Pơ, dêh char Gia Lai, ƀôh pơgar kơtao lơ̆m pơlei đei unh xa kơna ôr ar krao akŏm bơngai vang pĭt unh. Hơdai h năm tơroi ăn Khul kơdră pơgơ̆r tơring păng khul linh dân quân lơ̆m xăh vang năm pĭt, ưh ăn unh xa mơmrok truh dôm pơgar kơtao tơtil. Mă lei yoa tŏ hang, chă pĭt unh hăm ti, ưh đei kơmăy ‘lơ̆ng kơna unh xa truh 4,5 ha kơtao vă jê̆ koh bơih. ‘Nâu jĭ pơgar kơtao kơ 3 unh hnam tơ̆ plei An Quý, xăh Phú An, apŭng Đak Pơ. Kiơ̆ tơdrong tơchĕng blŭng a, unh xa kơtao âu rŏ năng yoa kon pơlei sŏh ‘ngiĕt pơm ăn unh xa mơmrok. Adrol kơ ‘nŏh, ƀât blŭng khei 3, tơ̆ plei Kruối Chai mơ̆n kŭm đei 1 ‘măng unh xa kơtao xăh 2,8 ha vă jê̆ kŏh ‘năi bơih. Anih vei lăng kon pơlei xăh Yang Bắc bơ̆ jang hăm Hnam kơmăy rol kơtao, pơm sĭk An Khê vă kŏh iŏk kơtao đơ̆ng unh xa, pơm tơjur ƀiơ̆ hiong răm ăn kon pơlei.

Vă jê̆ 1 khei vih tơ̆ âu, tơ̆ dôm tơring găh Hơlĕch dêh char Gia Lai hơnơ̆ng đei unh xa kơtao. Đĭ đei vă jê̆ 20 ha kơtao unh xa tơ̆ dôm apŭng Kông Chro, Đak Pơ, Kbang păng thĭ xăh An Khê. Ƀok Trần Văn Đấu, Phŏ Kơdră Anih vei lăng choh jang xa păng atŏk tơiung tơring tơrang apŭng Kông Chro tơroi, pơyan kơtao ‘nâu, apŭng đei vă jê̆ 10.000 ha kơtao. Dang ei hlŏh 1 puăt teh pơtăm kơtao đĭ kŏh đang bơih. ‘Năr tŏ kơnê̆ pơm ăn lơ pơgar kơtao tôch ƀônh đei unh xa: “Tơroi ăn kon pơlei hơtŏk đon hlôh vao vă tang găn, pĭt unh xa kơtao, ưh gơ̆h chĕp tơmam ƀônh đei unh xa mât tơ̆ tơring pơtăm kơtao. Găh noh dơ̆ng, bơ̆ jang kiơ̆ trong chong hơmet trong găn unh xa, ưh ăn unh xa mơmrok đơ̆ng pơgar 'nâu truh pơgar to”.

Tơring pơtăm kơtao găh Hơlĕch dêh char Gia Lai xă 30.000 ha. Truh dang ei, kon pơlei đĭ kŏh iŏk dang 65% teh pơtăm kơtao tơ̆ tơring păng tơchĕng adrol gô kŏh đang đĭ ƀât hơtuch khei 4 truh. Ƀok Nguyễn Hoàng Phước, Phŏ Kơdră Hnam kơmăy rol kơtao pơm sĭk An Khê ăn tơbăt, hnam kơmăy pơgơ̆r lơ ‘măng hôp hăm dôm tơring, unh hnam pơtăm kơtao, vang kơchăng tơlĕch lơ trong tang găn unh xa kơtao lơ̆m khei ‘năr tŏ phang hrei ‘nâu: “Mưh đei unh xa kơtao, hnam kơmăy kŭm hăm khul kơdră pơgơ̆r tơring, mih ma duch nă akŏm jơhngâm kŏh iŏk kơtao mă tĕnh vă chơ kơtao năm tơ̆ hnam kơmăy hrôih hlŏh. Ưh ‘mĕh đei tơdrong kiơ, mă lei mưh đei tơdrong bơih ‘nŏh nhôn răt kơtao unh xa reh ƀiơ̆ kơtao ‘lơ̆ng dang 100 rơbâu 1 tân. Vă pơjing tơdrong 'lơ̆ng, tơgŭm ăn mih ma duch nă oei đei lơi đơ̆ng 25 - 30 triu hlak jên 1ha, kơtao kŏh iŏk jô̆ păh lăp đei 78 tân 1ha”.

Sơnăm sơ̆, tơ̆ dêh char Gia Lai đei vă jê̆ 100 ‘măng unh xa, hăm 300 ha kơtao, ƀơm ưh ‘lơ̆ng truh tơdrong iŏk yoa đơ̆ng hlŏh 200 unh hnam kon pơlei. Yoa thoi noh, Anih vei lăng choh jang xa păng atŏk tơiung tơring tơrang dêh char athei Anih vei lăng kon pơlei dêh char Gia Lai pơtho ăn Công an dêh char hơtŏk tơdrong roi tơbăt găh tang găn unh xa kơtao lơ̆m dêh char; dăr hơlen, pơm hơdăh yoa kiơ đei unh xa, sek tơlang tơpăt dôm bơngai pơrơ̆ng sŏh phă kơtao.