VOV4.Bahnar - Jang kiơ̆ trong pơjao đơ̆ng Hơnih chĕppơgơ̆r Teh đak găh tang găn tŏ ‘mi kial pơrăm, năr brei (12/7), Khul bơ̆ jang Hơnih tơm vei lăng Kơtơ̆ng ang păng Pơre nơ̆r kơ yuơ Thứ trưởng Phạm Đức Long, kơdră jang lơ̆m Hơnih chĕp pơgơ̆r pơm kơdră khul hlôi bơ̆ jang hăm dêh char Kon Tum găh tang găn tŏ ‘mi kial pơrăm. 

Tơbăt hơdăh đơ̆ng Hơnih chĕp pơgơ̆r Tang găn tŏ ‘mi kial pơrăm -Tơchă dŏng păng Tang găn hơlau dêh char Kon Tum hăm khul bơ̆ jang đei ƀôh, truh dang ei đĭ đăng 102 tơring, phương, thĭ trân kơ dêh char hlôi pơjing Khul iung jang tang găn tŏ ‘mi kial pơrăm hăm hloh 5.200 ‘nu bơngai; pơđĭ 10 apŭng, pơlei tơm hlôi hơmet keh đang trŏ lăp hăm dôm tơdrong pơkoel vei lăng sơđơ̆ng hơrih sa jang sa kơ kon pơlei păng kiơ̆ tơdrong tơchơ̆t găh tang găn tŏ ‘mi kial pơrăm kơtă; tơbăt, pơma dơnuh tơgŭm ăn bơ̆ jang chĕp pơgơ̆r, pơrô̆ jang lơ̆m tang găn tŏ ‘mi kial pơrăm đei sơđơ̆ng. Iung pơma tơ̆ jơ bơ̆ jang, ƀok Phạm Đức Long pơma hơdăh truh trong jang “4 kơtă” lơ̆m tang găn tŏ ‘mi kial pơrăm; tơdrong atŏk kơtang bơ̆ jang pơtho tơbăt, pơjing trong pơprŏ jang tang găn tŏ ‘mi kial pơrăm, atŭm hăm ‘noh tơtom tơplih trong pơprŏ jang, trong jang tang găn hơlau tơ̆ hơnăp đei ƀôh hlĭch kơ tŏ ‘mi kial pơrăm.