Kơ iĕng Thủ tướng Teh đak Trần Lưu Quang pơm tơm jơ bơ̆ jang. Rim hla bơar chih tơbăt tơdrong jang sơkơ̆t hơdăh, Tây Nguyên đei lơ tơdrong rơvơn lơ̆m atŏk tơ iung mŭk drăm, kmăi kmŏk pơm tơlĕch tơmam drăm choh jang sa, ‘long, ŭnh hơyuh, atŏk tơ iung hơnih jang kmăi kmŏk sir iŏk, pơm tơlĕch bauxite, atŏk tơ iung tơmang pơhiơ̆ tơklep hăm tơdrong oei sa joh ayŏ kon kông. Mă lei, atŏk tơ iung mŭk drăm tơring tim mă pran kơtang, rim hơnih jang mŭk drăm tơm tơgop tim mă hơdăh. Kơdră chĕp pơgơ̆r rim dêh char Tây Nguyên akhan, hăm hơnih dơ̆ng gĭt kăl, Tây Nguyên kăl đei trong bơ̆ jang kơdih vă tơring iung jang kiơ̆ ‘lơ̆ng rim tơdrong đei, yak hloh tơring mơmat tat lơ̆m teh đak. Lăp đon hăm nơ̆r pơma ou, Kơ iĕng Thủ tướng Teh đak Trần Lưu Quang pơma hơdăh, Tây Nguyên ‘noh tơring ling lang đei hơnăp jang, hơnih dơ̆ng gĭt kăl găh mŭk drăm, chinh trĭ, tơpôl, vei lăng sơđơ̆ng teh đak, sơđơ̆ng dơ̆ng kơjăp kơ pơđĭ lơ̆m teh đak, kơna kăl đei tơdrong tơgŭm ăn trong bơ̆ jang, trong tơgŭm djru, khul jang ăn tơring ou lơ̆m khei năr kơnh.