Pơma ah jơ pơm jang, ƀok Nguyễn Trọng Nghĩa tơbang hơdah dôm tơdrong oei tơnap tap lơ̆m tơdrong jang joh ayŏ, tơplŏng kơdâu, tơmang pơhiơ̆ păng tơlĕch minh ƀar tơdrong jang mă Jơnŭm pơgơ̆r Đảng Ƀô̆ Joh ayŏ, Tơplŏng kơdâu păng Tơmang pơhiơ̆ kăl akŏm pơgơ̆r jang nhen athei pơtoi hơtŏk pran tơdrong jang pơ-‘lơ̆ng Đảng, pơtoi keh đang tơchơ̆t đơ̆ng khôi luơ̆t teh đak, sơkơ̆t kơjăp dôm tơdrong jang vei lăng joh ayŏ, keh đang jơnŭm pơgơ̆r jang gah joh ayŏ, tơplŏng kơdâu păng tơmang pơhiơ̆ kiơ̆ pơkăp bot, jang tơnăp.

Pơtoi tơrĕk akŏm bơngai jang, mă kăl noh bơngai jang hơgei kơ anih jang joh ayŏ, tơplŏng kơdâu păng tơmang pơhiơ̆... Kơdră Anih jang Tuyên giáo Trung ương Nguyễn Trọng Nghĩa pơkăl athei sơkơ̆t nơ̆r pơma xa, hơlen chih akŏm gah tơdrong jang tơpă, hơlen dôm ƀai hŏk hlôh vao, hơtŏk tơdrong pơma xa vă hơmet tơnăp ăn hop akŏm ‘măng mă 14.