Ƀlep lơ̆m năr tơbăt 98 sơnăm Năr Khul chih kơtơ̆ng ang kĕch mang Việt Nam, kơsơ̆ năr 16/6, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ tơƀơ̆p kơdră chĕp pơgơ̆r Ban Tuyên giáo Trung ương, Hơnih tơm vei lăng Kơtơ̆ng ang păng Pơre nơ̆r, Khŭl Chih kơtơ̆ng ang Việt Nam, rim bơngai chih kơtơ̆ng ang sơnăm ‘lŏ kră, kơdră tang măt rim hơnih chih kơtơ̆ng ang ‘nŏh rim kơdră lơ̆m Khul lăng hơlen blŭng păng Hơtuch ‘măng Pơlong Tơmam hơpăh Diên Hồng ‘măng mă blŭng, kơdră chĕp pơgơ̆r mĭnh ƀar hơnih chih kơtơ̆ng ang tơ̆ Trung ương păng tơring. Kơdră chĕp pơgơ̆r Kuô̆k hô̆i Vương Đình Huệ pơma hơdăh, Kuô̆k hô̆i ling lang lăng ba kơjăp pơjing keh đang tơdrong tơchơ̆t, trong tơgŭm djru hăm bơ̆ jang kơtơ̆ng ang, chih kơtơ̆ng ang.

Lơ̆m khei năr truh, Kơdră chĕp pơgơ̆r Kuô̆k hô̆i Vương Đình Huệ athei khul chih kơtơ̆ng ang kăl hơnơ̆ng vei kơjăp hơnih nơ̆ng, hơnăp jang vă jing mĭnh lơ̆m dôm tơdrong jang kăl hloh, tơgop pơchoh trong păng tơplih ‘nao Teh đak pháp quyền xã hội chủ nghĩa Việt Nam, trŏ lăp hăm trong atŏk tơ iung rơngei hiôk hian păng ‘lơ̆ng rŏ kơ chăl hle, vei lăng năng tông păng atŏk tơ iung keh kong ‘măng tơplih ‘nao tôm tong, hrơ̆p mĭnh ‘măng, vang mơ̆t hơdoi apŭng plĕnh teh hăm Hơpơi ‘meh vă Việt Nam nuih mơng pran kơtang sơnăm 2045.