‘Măng pơlong tốt nghiệp THPT sơnăm ‘nâu dêh char Kon Tum đei 5.028 ‘nu hŏk tro vang pơlong, lơ̆m noh đei hloh 1.700 ‘nu hŏk tro bơngai kon kông. Lơ̆m dêh char đei 12 hơnih pơlong tơpă hăm 224 lăm pơlong păng 9 hơnih pơ long hơmet hiă hăm 184 lăm pơlong. ‘Năr 27/6, Khŭl dăr hơ len găh tơdrong jang chĕp kơ̆l, pơgơ̆r lăng pơ long păng tơdrong jang dăr hơlen lăng pơlong ‘Măng pơlong tốt nghiệp THPT sơnăm 2023 đơ̆ng Anih tơm vei lăng găh pơtho pơhrăm yua đơ̆ng Thiếu tướng Nguyễn Văn Thế, Phŏ Chính ủy hnam trưng Đại học Nguyễn Huệ, Anih tơm vei lăng khŭl lĭnh pơm kơdră khŭl hlôi bơ̆jang hăm Jơnŭm vei lăng pơlong Anih vei lăng găh pơtho pơhrăm dêh char Kon Tum, hơdai hăm hơlen lăng kơtă tơ̆ dôm hơnih pơlong. Hơlen lăng đơ̆ng Khŭl hơlen lăng ăn ƀôh, dêh char Kon Tum hlôi hơmet tôm ăn ‘măng pơlong tốt nghiệp THPT sơđơ̆ng, tơpăt.

Jơnŭm vei lăng pơlong kơ Anih vei lăng găh pơtho pơhrăm dêh char Kon Tum hlôi vei kơ jăp păng pơgơ̆r bơ̆jang kiơ̆ ‘lơ̆ng dôm hla ar athei đơ̆ng Thủ tướng teh đak, tơdrong pơkăp, pơtho đơ̆ng Anih tơm vei lăng găh pơtho pơhrăm găh ‘măng pơlong  tốt nghiệp THPT sơnăm 2023 ƀlep hăm tơdrong yan âu. Khŭl bơ̆jang gô jang hơdai kơ jăp hăm anih jang kơpal kơ dêh char hơmet pơ ‘lơ̆ng tơ tom mưh đei tơdrong đei ƀôh tơgop vei sơđơ̆ng ‘lơ̆ng ăn ‘măng pơ long pơ gơ̆r sơđơ̆ng, tơpăt.