Đơ̆ng rŏng 15 sơnăm bơ̆ jang kiơ̆ Nơ̆r pơtho đơ̆ng Ban Bí thư Trung ương Đảng găh hơtŏk tơdrong răt ƀao hiêm pơgang lơ̆m chăl ‘nao, truh dang ei kơsô̆ bơngai đei răt ƀao hiêm pơgang tơ̆ dêh char Kon Tum hlŏh 93%. Lơ̆m nŏh kơsô̆ bơngai răt ƀao hiêm pơgang kiơ̆ unh hnam đei vă jê̆ 16%; hlŏh 85% kon pơlei lơ̆m dêh char đei chih hơmet, pơm hla ar vei lăng găh jơhngâm pran điên tư tơ̆ Hnam pơgang păng 100% hnam pơgang xăh khăm hơmet jĭ hăm ƀao hiêm pơgang.

Pơma tơ̆ jơ hơlen năng, ƀok Vũ Thanh Mai, Phŏ kơdră chĕp kơ̆l Ban Tuyên giáo Trung ương, akhan, hơdai hăm tơgŭm đơ̆ng trung ương, vă vei kơjăp păng hơnơ̆ng hơtŏk kơsô̆ bơngai răt ƀao hiêm pơgang, Kon Tum athei hơtŏk tơdrong roi tơbăt găh tơdrong tơgŭm păng đei yoa đơ̆ng ƀao hiêm pơgang; tưk tơiung anih jang pơgang tơ̆ tơring, mă loi jĭ hơtŏk tơdrong ‘lơ̆ng mưh khăm hơmet jĭ, pơjing tơdrong hiôk hian ăn bơngai jĭ đei xa yoa dôm tơdrong tơgŭm găh jang pơgang.