Tơ̆ ‘măng akŏm, tơdrong pơkăp teh tơmo kăp gĭt hơlơ̆k hơle tơ̆ lơ tơring kon pơlei oei xa, jing tơdrong đei lơ kon pơlei tah hla pơtruh nơ̆r. Kiơ̆ Tơchơ̆t kơsô̆ 866 đơ̆ng Thủ tướng teh đak, pơlei tơm Bảo Lộc đei jê̆ 4.300 ha teh lơ̆m pơkăp chă hơlen, sir kôch, iŏk yua tơmo kăp gĭt jăl sơnăm 2021 - 2030 păng sơkơ̆t truh sơnăm 2050. Lơ hơgăt âu lơ̆m xah, phương kơdrơ̆m, đei lơ kon pơlei oei xa noh ưh hơdrô̆ pơm tơnap tap ăn tơdrong hơrih xa, jang mŭk drăm kon pơlei mă tơdrong ming man tơdrong kăl ăn hơdrih xa kon pơlei, hơvơn asong jang, hơtŏk mŭk drăm tơpôl kơ tơring adoi ƀơm tơhlăk tơhlĭn.

Tơ̆ jơ pơma dơnuh, ƀok Trần Đình Văn, Kơdră Khul jang tang măt ăn Kuôk hô̆i dêh char Lâm Đồng akhan, pơkăp tơmo gĭt oei hơlơ̆k hơle hăm lơ tơdrong pơkăp jang nai đơ̆ng trung ương păng tơ̆ tơring. Tơdrong mă âu pơm tơhlăk tơhlĭn gah khôi luơ̆t, jing tơdrong pơgăn vă tơlĕch pơm jang minh ƀar tơdrong kăl kơ dêh char. Tơdrong mă âu đei Khul jang tang măt ăn Kuôk hô̆i adoi pơtruh nơ̆r hăm Kuôk hô̆i, hăm Jơnŭm pơgơ̆r teh đak păng Thủ tướng teh đak lơ̆m ‘măng hop akŏm âu ki vă đei trong tơlĕch jang tơnăp hloh.