Hop akŏm đei pơgơ̆r kơtă tơ̆ anih jang Hô̆i đŏng kon pơlei dêh char Đăk Lăk păng trư̆k tuyê̆n tơ̆ 6 anih kơ dôm apŭng Cư M’gar, Krông Ana, M’Drak, Ea Kar, Krông Bông, Lăk. Hloh 1.200 ‘nu kon pơlei tah hla hlôi akŏm pơma dơnuh lơ̆m ‘măng âu. Pơma ah hop akŏm, Khul tang măt Kuôk hô̆i dêh char Đăk Lăk bơnê kơ nơ̆r tơgop kăp gĭt, tơƀôh sơnong jang tơnăp đơ̆ng kon pơlei.

Atŭm hăm noh pơma đam kơtă, pơm hơdah dôm tơdrong mă kon pơlei oei pơngơ̆t kơ đon păng sơkơ̆t dôm nơ̆r tơgop đơ̆ng kon pơlei gô đei Khul tang măt Kuôk hô̆i dêh char păng dôm jăl jang chih akŏm, pơtruh ăn anih jang kơpal, dah hrôih sek tơlang kiơ̆ tơchơ̆t, pơm trŏ tơdrong hơpơi ‘meh kăp gĭt đơ̆ng kon pơlei.

- Lơ̆m 2 năr, năr 30/11 păng năr 1/12, Khul Kơdră tang măt Kuô̆k hô̆i dêh char Dak Nông hlôi pơgơ̆r tơƀơ̆p pơma dơnuh hăm bơngai tăh hla tơ̆ tơring Đak Ndrot, apŭng Đak Mil; tơring Tâm Thắng (Cư Jút); tơring Đak Hoà (Đak Song) hăm phương Quảng Thành, pơlei tơm Gia Nghĩa.

Tơ̆ rim ‘măng tơƀơ̆p, lăp đơ̆ng rŏng mơ̆ng rim kơdră tang măt Kuôk hô̆i tơroi tơbăt pơtôch ‘măng Hop akŏm mă 6, Kuô̆k hô̆i jăl XV, bơngai tăh hla tơbăt jơhngơ̆m đon chơt hơ iă găh tơdrong jơnei kơ hop akŏm păng hôn bơnê kơtang dôm tơdrong hơdrin đơ̆ng rim kơdră tang măt dêh char Dak Nông hlôi tơtom tơƀôh tơbăt dôm tơdrong kăl lơ̆m yan au, trŏ lăp hăm jơhngơ̆m đon hơpơi ‘meh vă đơ̆ng bơngai tăh hla. Bơngai tăh hla Đak Nông jei apĭnh athei bơ̆ jang ‘lơ̆ng hloh dơ̆ng tơdrong jang vei lăng năng tông hơrih sa tơpôl, kăl tơgŭm djru ƀao hiêm jang pơgang ăn kon pơlei tơnap tap; mă kăl đei trong tơgŭm găh jên khei, tơdrong tơgum djru trŏ lăp ăn khul kang ƀô̆ ƀok thây pơgang, ƀok thây kô pơtho; păng hơmet pơ ‘lơ̆ng tơdrong ưh kơ măh pơgang ming hơmet jĭ jăn, ưh kơ măh pơgang vaccine ƀet bơ̆ng ăn đe hơ ioh.