Thủ tướng pơma hơdăh, Khul kơdră teh đak Việt Nam hơnơ̆ng pơlung dôm anih tĕch mơdro Trung Quốc pơih xă tơdrong jang hơdoi, hơtŏk tơdrong tơmât jên jang lơ̆m dôm tơdrong mă Trung Quốc jang pran, Việt Nam ‘mĕh vă păng vă tơgŭm jên jang hơdrol, nhen tơplih ‘nao rơgei, tơplih hăm kơmăy sô̆, tơring kơdrâm rơgei, kơmăy kơmŏk pơm tơmam ‘lơ̆ng, man trong gre teh, trong gre treng, jang pơgang, pơtho pơhrăm…, pơjing păng tơlĕch dôm tơdrong jang hơdoi mă hơdăh kiơ̆ dôm trong jang hơdoi 2 pang hlôi đei pơjing păng dôm trong jang hơdoi lơ pang mă 2 păh vang bơ̆ jang.

Thủ tướng oei hơpơi ‘mĕh dôm anih tĕch mơdro tih kơ Trung Quốc vang jang hơdoi vă jăh đei dôm tơdrong jang tih, kơmăy kơmŏk ‘nao păng lăp hăm tơdrong ‘mĕh vă đơ̆ng Việt Nam, tơmât yoa trong tĕch mơdro kơjăp ‘lơ̆ng găh jang mŭk drăm rơgŏh, mŭk drăm kơsô̆, mŭk drăm rơgei, pơjing tơdrong ‘lơ̆ng ăn dôm anih tĕch mơdro Việt Nam vang mât lơ̆m trong jang pơm hơtŏk kơjă, pơtruh tơmam đơ̆ng dôm grŭp jang, tơring păng lơ̆m plei teh.